Foto: Eńbek jáne halyqty áleýmettik qorǵaý ministrligi
Astanaǵa ishki kóship kelýshiler legine eshqandai shekteýler bolmaidy. Bul týraly QR Premer-Ministriniń orynbasary – Eńbek jáne halyqty áleýmettik qorǵaý ministri Tamara Dúisenova jýrnalistermen kezdesýde aitty, dep habarlaidy "Ult aqparat".
Is-sharaǵa Eńbek jáne halyqty áleýmettik qorǵaý ministriniń birinshi orynbasary Aqmádi Sarbasov, QR EHÁQM Kóshi-qon komitetiniń tóraǵasy Asqarbek Ertaev ta qatysty.
Kezdesý barysynda Tamara Dúisenova jýrnalisterge Memleket basshysynyń Astana qalasyn damytý máseleleri jónindegi keńeste bergen tapsyrmalaryn iske asyrý úshin QR EHÁQM janynan jumys toby qurylǵanyn málimdedi. Onyń quramyna Ishki ister, Indýstriia jáne infraqurylymdyq damý, Densaýlyq saqtaý ministrlikteriniń, Astana qalasy jáne Aqmola oblysy ákimdikteriniń ókilderi, sondai-aq kóshi-qon salasyndaǵy sarapshylar kirgen.
«Jumys toby músheleriniń pikirinshe, shekteý jáne tyiym salý sharalaryn belgileý elordaǵa kóship kelýshiler leginiń ósý problemasyn sheshe almaidy. Sondyqtan ishki kóship kelýshiler úshin Astanaǵa kóshýge qandai da bir tyiym salý týraly sóz bolyp otyrǵan joq», – dedi Premer-Ministrdiń orynbasary.
Tamara Dúisenova jumys toby halyqaralyq tájiribeni eskere otyryp, zańnamaǵa túzetýler engizý boiynsha birqatar usynystar ázirlegenin aitty.
"Birinshi – azamattardyń respýblikalyq mańyzy bar qalalarda jáne astanada turaqty turý merzimin qaita qaraý. Kommýnaldyq turǵyn úi qorynan turǵynjailar nemese jeke turǵyn úi qorynan jergilikti atqarýshy organdar (budan ári – JAO) jaldaǵan turǵynjailar alý maqsatynda olardy esepke qoiý usynylady.
Ekinshi – turǵyn úilerdi, onyń ishinde kommýnaldyq turǵyn úi qorynan turǵyn úilerge nemese jeke turǵyn úi qorynan JAO jalǵa alǵan turǵyn úige, turǵyn úilerge, páterlerge, sondai-aq adamdardyń turýy úshin, onyń ishinde jalǵa berý úshin paidalanylatyn ǵimarattar men úi-jailarǵa berý jónindegi normativterdi bekitý usynylady.
Úshinshi – qalanyń qurylysyn tiimdi salý maqsatynda Indýstriia jáne infraqurylymdyq damý ministrligine Bas jospardyń jobalyq sheshimderin, egjei-tegjeili josparlaý jobasyn jáne qurylys salý jobasyn qoǵamdyq talqylaýdy júrgizý qaǵidalaryn ázirleý jáne bekitý jónindegi quzyretti berý usynylady. Bul qoǵamdyq talqylaýlar ótkizý kezinde eldi mekenniń arhitektýrasyn qalyptastyrýda jáne qala qurylysyn josparlaýda qala azamattarynyń pikirin ashyq jáne jariia eskerýge múmkindik beredi.
Tórtinshi – migranttardy tirkeýdiń biryńǵai júiesin qurý maqsatynda qoldanystaǵy aqparattyq júielerdi integratsiialaý" - delingen Eńbek jáne halyqty áleýmettik qorǵaý ministrligi habarlamasynda.
Vedomstvo málimetinshe, zańnamaǵa usynylǵan túzetýlerdi talqylaý boiynsha jumys jalǵasyp jatyr.
