«Astanaenergoservis» AQ elordanyń aspanyn basyp turǵan tútinge Jylý elektr ortalyǵynyń qatysy joq degen paiymǵa kelip otyr, dep habarlaidy "Ult aqparat" kompaniianyń baspasóz qyzmetine silteme jasap.
Búgingi tańda Astanada eń kóp talqylanyp jatqan taqyryptardyń biri - Astana aspanyn basqan tútinniń paida bolýy. «Astanaenergoservis» AQ baspasóz qyzmeti tútindi tuman - tútinnen, tumannan jáne shańnan kóterilgen aerozol ekenin, jelsiz kúnderi kók tútin shahardyń kóshelerin basyp qalatynyn habarlaidy.
«Jylý elektr ortalyǵynyń qubyrynan shyǵatyn tútin «tútin búrkeýinen» aitarlyqtai joǵary ornalasqan. Jylý elektr ortalyǵynyń joǵary biiktikte ornalasqan (100, 120, 150, 180 metr) qubyrlarynan shyqqan tútin gaz aǵymynyń joǵary jyldamdyǵynyń arqasynda tarap ketetindikten, qalany tútinniń basyp ketýine olardyń (JEO-lardyń) qatysy joq», - delingen habarlamada.
«Astanaenergoservis» AQ baspasóz qyzmetiniń aqparatyna sensek, JEO-2 gradirniasynan shyǵatyn sý býynyń býdaǵyn keibireýler tútinmen shatastyratyn kórinedi. Aita keterligi, gradirnia - atmosferalyq aýa aǵynymen baǵyttalǵan tehnologiialyq protsesste sýdyń aýqymdy mólsherin salqyndatýǵa arnalǵan qondyrǵy. Keide gradirniany «salqyndatqysh munara» dep te ataidy. Ásirese, aiaz túsken kezde sý býy anyq baiqala túsedi. «Bý qondyrǵylarynda ystyq sýdy salqyndatýǵa arnalǵan munara túrindegi tońazytqyshtyń býdaǵy qorshaǵan ortaǵa ziian keltirmeidi. Ai saiyn Astana qalasynyń JEO-1 jáne JEO-2 kásiporyndarynda atmosferany lastaýshy bólinisterdiń zerthanalyq monitoringi júrgiziledi. Sondai-aq, stantsiiadaǵy qazandyq arregattary statsionarly kózderden shyǵatyn shyǵaryndylarǵa turaqty ári avtomatty túrde baqylaý júrgizetin júielermen jabdyqtalǵan. Monitoringtiń málimetteri standarttarǵa sáikestikti rastaidy. Jyl saiyn «Astana-Energiia» AQ atmosferaǵa lastaýshy bólinisterdi azaitý boiynsha tiimdi sharalardy josparly túrde oryndaýda», - deidi «Astanaenergoservis» AQ-nan.
Kompaniia óziniń habarlamasynda, Astana qalasynda qazirgi tańda jeke sektor turǵyndarynyń kóp bóligi ot jaǵyp, úiin jylytyp otyrǵandyqtan «tútin búrkeýi» paida bolyp otyrǵanyn habarlaidy.
«Budan basqa, iri qalalarda aýanyń lastanýynyń sebebi fotohimiialyq tútin bolyp tabylady. Ol avtokólikter sanynyń kóbeiýimen tikelei bailanysty», - dep habarlaidy kompaniianyń baspasóz qyzmeti.
