Foto: toppress.kz
Astana qalasynyń máslihaty qaladaǵy jańa, besinshi aýdan ataýyn Nura dep bekitti, - dep habarlaidy Tengrinews.kz portaly.
Astana qalasy Tilderdi damytý jáne muraǵat isteri basqarmasynyń basshysy Sáken Esirkeptiń aitýynsha, 2022 jyldyń 1 jeltoqsanynda onomastikalyq komissiianyń kezekti otyrysy ótip, onda jańa aýdan qurý máselesi qaralǵan.
"Ózderińiz biletindei, besinshi aýdan qurý týraly másele kópten beri kóterilip keledi. Bul másele kóterilgennen beri ziialy qaýym ókilderi men ǵalymdar jańa aýdannyń ataýyn uzaq talqylady. Biz eldiń tarihy men geografiiasyna qatysty ataýlardy qarastyrdyq. Onomastikalyq komissiianyń kún tártibine eki ataý usynyldy. Nurany tańdadyq. Bul Qaraǵandy men Aqmola oblystarynyń aýmaǵynda aǵyp jatqan ózen. Nura - bizdiń geografiiamyzdaǵy mańyzdy ózenderdiń biri, mańyzdy geografiialyq ataý. Buryn Esil men Nura birtutas ózen bolyp sanalatyn. Osy simvolizmdi eskere otyryp, sol jaǵalaýda Esil men Nura aýdandary bolǵany durys bolar dep sheshim qabyldadyq", - dedi Esirkep.
