Foto: Úkimettiń baspasóz qyzmeti
Premer-ministr Oljas Bektenov Astanadaǵy LRT qurylysynyń barysymen tanysty, - dep habarlaidy Úkimettiń baspasóz qyzmeti.
Úkimettiń baspasóz qyzmeti málimetinshe, qazirgi ýaqytta nysanda relster tóselip jatyr – uzyndyǵy 2 shaqyrym bolatyn ýchaskede, sondai-aq optikalyq talshyqta jumys aiaqtaldy. Biyl jumysqa 2 myńǵa jýyq adam jumyldyryldy, jaz mezgilinde nysanǵa 5 myńǵa jýyq maman tartylady.
"CTS" JShS basqarma tóraǵasy Asylbek Dúisebaev 25 qazanda LRT-ny testilik rejimde iske qosý, iaǵni jolaýshysyz poiyzdardy synaqtan ótkizý josparlanyp otyrǵanyn habarlady. Astanadaǵy jeńil relsti kólik jobasy ozyq GoA4 standartyna sáikes júzege asyrylyp jatyr, bul 6 ailyq synaq merzimin talap etedi.
"LRT jobasynyń qurylysy qarqyndy júrgizilip jatyr. Byltyr estakadany, kópirdi jáne stansalardyń temirbeton jumystaryn aiaqtadyq. Astanada temirbeton shpaldaryn óndiretin zaýyt iske qosyldy. Rels tóseýdi bastadyq. Deponyń, stansalardyń qurylysy júrip jatyr. Sondai-aq arnaiy qyzmetkerlerdi oqytý qolǵa alyndy. LRT jelisi boiynsha abattandyrý jumystary júrgiziledi, oǵan jaiaý júrginshilerge, velosiped tebýge, júgirýge arnalǵan joldar, sonymen qatar qala turǵyndary úshin demalys aimaqtary kiredi", - dedi "City Transportation Systems" JShS basqarma tóraǵasy Asylbek Dúisebaev.
Áýejaidan Rysqulov kóshesine deiin iri aǵashtar men kópjyldyq butalar otyrǵyzylyp, avtomatty sýarý júiesin ornatý josparlanǵan. Qabanbai batyr dańǵyly boiymen Syǵanaq kóshesine deiingi aýmaq balalar jáne sport alańdary, jaiaý júrginshiler joldary qoǵamdyq keńistikterge bólingen. Ári qarai jolaýshylar aǵyny belsendi 2-temirjol vokzalyna deiin keń avtoturaqtar, velosipedke arnalǵan joldar jasalyp, kógaldandyrý qarastyrylǵan.
Oljas Bektenov deponyń basqarý ortalyǵy aýmaǵynda qurylys-montaj jumystarynyń barysymen de tanysty. Joba qytailyq seriktes China Railway Asia-Europe Construction Investment Co., Ltd. kompaniiasymen birlesip júzege asyrylyp jatyr. Tolyq avtomattandyrylǵan depo quramdardy turaqqa qoiýǵa jáne jóndeýge, materialdar men qosalqy bólshekterdi saqtaýǵa arnalǵan 13 negizgi ǵimarattan quralǵan. Sondai-aq munda dispetcherlik pýnkt, bailanys toraby jáne LRT paidalanýshy kompaniianyń ákimshilik keńsesi bar barlyq qoǵamdyq kólik túrlerin basqaratyn ortalyq salynyp jatyr.
Depo alańynda LRT-ǵa arnalǵan jyljymaly quramdy óndirýshi CRRC Tangshan Co.,Ltd. zaýytymen beinebailanys arqyly tikelei qosylym boldy. Premer-ministrge LRT boiymen jolaýshylardy tasymaldaityn lokomotivterdiń erekshelikteri baiandaldy. Barlyǵy 650 orynǵa eseptelgen 19 tórt sektsiialy quram jumys isteitin bolady.
Tangshan CRRC Group kompaniiasynyń basqarma tóraǵasy Chjoý Tsziýnian qazirgi ýaqytta óndiriste saǵatyna 350 km/saǵ deiin joǵary jyldamdyqty poiyzdar óndirisindegi tehnologiialar men standarttardy qoldana otyryp, alǵashqy eki quramdy qurastyrý jumystary júrgizilip jatqanyn atap ótti.
Qurastyrý tikelei qurylys alańynda júrgiziledi. Ár quram 36 joǵary sapaly monitormen, 11 kameramen jáne poiyzdardy avtomatty basqarý júielerimen jabdyqtalady.
