Búgin Nur-Sultan qalasynda «Astanadaǵy EQYU-2010 sammitiniń tarihi máni men ózektiligi» halyqaralyq onlain-konferentsiiasy ótti, dep habarlaidy "Ult aqparat".
Is-shara QR Tuńǵysh Prezidenti – Elbasy kitaphanasy men QR Syrtqy ister ministrligi, Nur-Sultandaǵy EQYU baǵdarlamalar keńsesi QR Tuńǵysh Prezidenti – Elbasy keńsesiniń qoldaýymen uiymdastyryldy.
2010 jyly Qazaqstan – Ortalyq Aziianyń birinshi ókili, postkeńestik keńistiktegi elder arasyndaǵy alǵashqy memleket jáne eýropalyq qurylymǵa tóraǵalyq etken alǵashqy musylman eli bolǵany belgili. Qazaqstannyń Tuńǵysh Prezidenti – Elbasy Nursultan Ábishuly Nazarbaev Qazaqstannyń EQYU-ǵa tóraǵalyq etýiniń bastamashysy jáne ideology boldy.
Halyqaralyq konferentsiiaǵa qatysýshylarǵa Qazaqstan Respýblikasynyń Tuńǵysh Prezidenti – Elbasy N.Á. Nazarbaevtyń atynan quttyqtaý sózin Qazaqstan Respýblikasynyń Tuńǵysh Prezidenti–Elbasynyń keńesshisi – Qazaqstan Respýblikasynyń Tuńǵysh Prezidenti-Elbasy Keńsesi Aqparattyq-taldamalyq qamtamasyz etý bóliminiń meńgerýshisi Ádil Tursynov oqyp berdi.
«Astana qalasynda 2010 jyly jeltoqsanda ótken Eýropadaǵy qaýipsizdik pen yntymaqtastyq uiymymynyń 10 jyldyǵyna arnalǵan halyqaralyq konferentsiianyń qatysýshylaryna ystyq yqylasymdy bildiremin. Atalǵan joǵarǵy deńgeidegi kezdesý Eýropa, Ortalyq Aziia jáne Soltústik Amerikadaǵy 57 memleketti biriktiretin iri ári mańyzdy transkontinentaldy uiym – EQYU-daǵy Qazaqstan Respýblikasy tóraǵalyǵynyń asa aitýly oqiǵasynyń biri boldy. Ózderińiz biletindei, Uly dala eli postkeńistikte EQYU-ny basqarý mártebesine ie bolǵan alǵashqy memleket. Bul mansapqa ótinim berýdi ilgeriletý isimen tikelei ózim ainalysqan men eń aldymen uiymnyń róline baiypty taldaý júrgizip, onyń bolashaǵyn somdaý úshin bizdiń eldiń halyqaralyq arenadaǵy jaýapty ári beibitsúigish saiasaty arqyly «ortaq januiany» uiystyra alatyn qabiletin eskerdim...Ádiletti de ornyqty álemdi, sondai-aq Atlant muhitynan Tynyq muhityna, Soltústik Muzdy muhittan Úndi muhityna deiingi «tórt muhit» keńistigindegi strategiialyq turaqtylyq pen qaýipsizdikti qalyptastyrý isinde Qazaqstannyń tóreǵalyǵymen EQYU-nyń Astana sammitiniń murasy ózektiligin joǵaltpaitynyna senimdimin», - dedi Elbasy Nursultan Nazarbaev óziniń Úndeýinde.
QR Premer-Ministriniń orynbasary, QR Syrtqy ister ministri Muhtar Tileýberdi óz sózinde Qazaqstan men EQYU-nyń ózara is-qimylynyń dialog pen álemdi ilgeriletý boiynsha basty basymdyqtaryn atap ótip, bizdiń eldiń 2020 jyly AÓSShK-ke tóraǵalyq etkenin eske saldy.
«Biz EQYU men AÓSShK arasynda tájiribelik yntymaqtastyqty ornatý úshin járdemdesýge daiynbyz, óitkeni bul eki alań Eýraziianyń negizgi máselelerin sheshýde birdei maqsattar qoiyp, uqsas tásilderge súienedi. Osyǵan bailanysty áriptesterimizdi AÓSShK pen EQYU dialogynyń, sondai-aq AÓSShK-ni Aziiadaǵy qaýipsizdik jáne damý uiymyna aýystyrý ideiasyn qoldaýǵa shaqyramyz. Astana sammitiniń negizgi taqyryptary –Eýroatlantikalyq jáne Eýraziialyq keńistiktegi dialog pen turaqty qaýipsizdik máseleleri, Aýǵanstan máselesi, «qatyp qalǵan» qaqtyǵystardy sheshý búgingi kúnge deiin ózekti», – dedi M.Tileýberdi.
Konferentsiianyń moderatory jáne baiandamashysy bolǵan Elbasy kitaphanasynyń direktory Baqytjan Temirbolat el táýelsizdiginiń mereitoilyq 30 jyldyǵynda Qazaqstan basqarý men kúndelikti ómirde demokratiialyq praktikalardy damytý boiynsha óz jolyn jalǵastyryp kele jatqanyn senimdi túrde málimdei alatynymyzdy atap ótti. Qazaqstannyń Tuńǵysh Prezidenti – Elbasy N.Á. Nazarbaev óziniń basqarýy kezinde saiasi júieni jańǵyrtý saiasatyn sanaly jáne maqsatty túrde júrgizdi.
«Qazaqstan Respýblikasynyń Prezidenti Q.K.Toqaev qazaqstandyq demokratiiany odan ári damytýǵa baǵyttalǵan jańa saiasi reformalardyń úsh iri paketine bastamashylyq etti. Qazirdiń ózinde memleket basshysynyń birqatar bastamalary zań deńgeiinde bekitilip, praktikada qoldanysqa endi. Bul bizdiń osydan onshaqty jyl buryn tańdaǵan demokratiialy jolymyzdy Qazaqstan basshylyǵynyń jańa legi izin buzbai, jalǵastyryp keledi degendi bildiredi. Árine, alda áli de kóp jumys kútip tur, biraq bizdiń EQYU-men bailanysymyz burynǵydai Qazaqstannyń damýyna ǵana emes, EQYU-nyń ózine de, sondai-aq Eýraziialyq keńistiktegi qaýipsizdikti nyǵaitýǵa da oń yqpal etetinine senimdimin», - dep atap ótti B.Temirbolat.
Kezdesý qatysýshylaryna arnaiy daiyndalǵan qysqametrajdy beinefilm kórsetildi. Onda Qazaqstan Respýblikasynyń Tuńǵysh Prezidenti – Elbasy N.Á.Nazarbaev jáne jetekshi saiasi kóshbasshylar EQYU sammitin ótkizýge daiyndyq barysy jáne sol jyldardaǵy resmi hronikanyń kadrlarynan tys qalǵan uiymǵa qatysýshy elder arasyndaǵy kúrdeli diplomatiialyq kelissózder týraly estelikterimen bólisti.
Konferentsiia barysynda EQYU-nyń qazirgi tóraǵasy, Shvetsiia Koroldiginiń Syrtqy ister ministri Ann Linde men EQYU-nyń Bas hatshysy Helga Shmidtiń beine úndeýleri usynyldy. Sonymen qatar EQYU tóraǵasy (2010 j.) Qanat Saýdabaevtyń, EQYU-nyń eks bas hatshysy bolǵan (2005-2011 jj.) Mark Perren de Brishambonyń, Qazaqstannyń belgili qoǵamdyq-saiasi qairatkeri Qýanysh Sultanovtyń, EQYU-nyń az ulttar isteri jónindegi Joǵarǵy komissary Qairat Ábdirahmanovtyń, EQYU Parlamenttik assambleiasynyń Bas hatshysy Roberto Montellanyń, EQYU Adam saýdasyna qarsy kúres jónindegi arnaiy ókili men úilestirýshisi (2014-2018 jj.) Mádina Jarbosynovanyń, Qazaqstan Respýblikasynyń Vena qalasyndaǵy halyqaralyq uiymdar janyndaǵy Turaqty ókili Qairat Omarovtyń, EQYU baǵdarlamalary keńsesiniń basshysy Derd Sabonyń jáne t.b. baiandamalary tyńdaldy.
Konferentsiia sońynda qatysýshylar EQYU men onyń qurylymdary kún tártibi boiynsha dástúrli dialogty ilgerilete otyryp, Uiymǵa qatysýshy elder tap bolyp otyrǵan jańa qaterler men qarsy is-qimylǵa belsendi jumylýǵa nazar aýdarý kerek degen pikirge keldi.
