Astanalyq dárigerler elordadaǵy besinshi ana ólimine qatysty túsinikteme berdi, dep habarlaidy QazAqparat tilshisi.
1 qyrkúiek kúni 20:22-de №2 kópbeiindi qalalyq aýrýhanada ana ólimi tirkelgen bolatyn. Bul - jyl basynan beri Astanada qaitys bolǵan besinshi ana.
«Qaitys bolǵan áiel qant diabetimen aýyrǵan. Júktiliktiń alǵashqy kezeńinen-aq, №7 emhanaǵa tirkelip, qabyldaýǵa turaqty barǵan. Biraq ol insýlindik terapiiadan bas tartqan jáne dárigerler qant deńgeiin túsiretin tabletkalar jazyp bergen. Onyń ústine, áieldiń boiy 165 sm bola tura, salmaǵy 95 keliden asqan. Aldyńǵy balalaryn tabiǵi jolmen dúniege ákelgendikten, dárigerler oǵan kezekti ret óz kúshimen bosanýǵa múmkindik bergen», - dedi №2 kópbeiindi qalalyq aýrýhananyń bas dárigeri Ivan Li Astana ákimdiginde ótken brifingte.
Sonymen birge, brifingte qaitys bolǵan áielge qoiylǵan aldyn-ala diagnoz habarlandy.
«Bul - aiaqasty bolǵan ólim. Aldyn ala boljam boiynsha, qaitys bolǵan áielge «Qaǵanaq sýynyń emboliiasy» diagnozy qoiyldy. 2 qyrkúiekte patologiialyq soiý júrgizilgende, bul diagnoz rastaldy. Biraq, bul áli de aldyn ala boljam bolyp qala beredi, apta sońynda patalogoanatomdar gistologiialyq zertteýden keiin naqty diagnozdy jariialaidy», - dedi Astana qoǵamdyq densaýlyq saqtaý basqarmasy basshysynyń orynbasary Áliia Rústemova.
Qazaqstannyń shtattan tys bas akýsher-ginekology, professor Ivan Korkannyń aitýynsha, Qaǵanaq sýynyń emboliiasy - óte sirek dert, 10-15 myń júkti áieldiń birinde ǵana kezdesedi. Bul jaǵdaida qaǵanaq suiyqtyǵynyń áieldiń qan aǵysyna túsýinen júktilik nemese bosaný asqyndaidy.
«Ony aldyn ala boljaý álemde múmkin emes. Meditsinalyq kómek kórsetilgenimen, áielderdiń 90% kóz jumady. Bul - álemdik statistika. Dárigerler áieldi qutqarý úshin bárin jasaidy, eshqandai dáriger patsientti joǵaltqysy kelmeidi. Dárigerler úshin de, týystary úshin de bul - orny tolmaityn ortaq qaiǵy», - dedi brifingte Ivan Korkan.
Bas akýsher-ginekolog bul aýrýǵa sanaýly minýttardyń jetkilikti ekenin aitty.
«Bosaný aldynda qaǵanaq sýynda náresteniń teri bólikteri, zári men nájisi bolady. Osynyń barlyǵy áieldiń qan aǵysyna túsýge tyrysady. Munda sanaýly minýttardyń ózi mańyzdy. Tipti der kezinde meditsinalyq kómek kórsetilse de, nátijesiz bolýy múmkin. Álem boiynsha bul diagnozda áielderdiń 10 protsenti qaǵanaq sýy az mólsherde engende ǵana aman qalady», - dedi Ivan Korkan.
Áieldiń júrek qyzmeti toqtaǵan sátte kesir tiligi arqyly balany alý týraly sheshim qabyldanǵan. Ázirge shaqalaqtyń jaǵdaiy aýyr, biraq dárigerler sábidiń ońalyp ketý múmkindigi mol ekenin jetkizdi.
