Astanadaǵy qoǵamdyq kólik júrgizýshileriniń eńbekaqysy ósedi, dep habarlaidy QazAqparat.
«Qazirgi kezde tasymaldaýshylar básekelik talaptar boiynsha eńbekaqyny belgileidi. Keibireýleri onyń deńgeiin 400 myń teńgege qoisa, qalǵandary 500 myń teńge tóleýge ázir ekenin aitýda. Sondyqtan avtobýs júrgizýshisi ornyna úlken konkýrs bolady. Osyndai eńbekaqy alý úshin shtatta jumys istep, óziniń tabysyn ashyq kórsetýi tiis», - dedi «QazAqparat» tilshisine «Astana LRT» JShS-nyń baspasóz hatshysy Naýat Azanbaeva.
Onyń sózine qaraǵanda, qoǵamdyq kólik júrgizýshileriniń áleýmettik jaǵdaiyn jaqsartýǵa jergilikti bilik tarapynan sýbsidiialaý kómektesedi.
«Avtoparkter sýbsidiialaýǵa kóship jatyr. Alaida sýbsidiiany alý úshin barlyq sharalar ashyq bolýy kerek. Tabys boiynsha, júrgizýshilerdiń eńbekaqysy, salyq tólemderi turǵysynda esepter usynýy qajet. Qazir biz osylardy talap etýdemiz. Óitkeni onsyz sýbsidiiany alý múmkindigi joq», - dep túsindirdi ol.
«Tasymaldaýshylar bir jolaýshynyń jol júrýi 301 teńgege teń ekenin aitýda. Óz kezeginde ákimdik bul soma tym kóp ekenin alǵa tartyp, qosymsha jáne basqa da shyǵyndardy azaita otyryp, qaita esepteý sharalaryn júrgizýdi surady. Nátijesinde, 198 teńge deńgeiindegi kórsetkish shyqty, al jolaýshylar 90 teńge tóleidi. Ákimdik árbir jolaýshy úshin parkterge 108 teńge qosymsha tóleidi», - dedi N. Azanbaeva.
Belgili bolǵandai, qazirgi kezde avtobýstarǵa júrgizýshilerdi irikteý júrip jatyr. Biliktilikti arttyrýdan ótkennen keiin, olar jumysqa ornalastyrylady.
Budan buryn habarlanǵandai, differentsiialanǵan tarif engizilgen soń jáne jolaýshylardyń jappai kóliktik kartalarǵa kóshýi avtobýstaǵy kóptegen júrgizýshilerdiń jumystan ketýine sebep boldy.
Sonyń saldarynan qalalyq avtobýstarda keibir baǵdarlardyń júrýi boiynsha ýaqyt aralyǵynyń uzarýy baiqalyp otyr.
