Foto: gov.kz
Astana qalasynyń ákimi Jeńis Qasymbek Instagram paraqshasynda jyl sońyna deiin aiaqtalatyn qurylys keshenderi týraly jazdy, dep habarlaidy elorda ákimdiginiń resmi saity.
«Jyl sońyna deiin qurylysy uzaqqa sozylǵan taǵy 9 turǵyn úi keshenin aiaqtaýdy josparlap otyrmyz. Olardyń arasynda 13 jyldan beri baspanasynyń qurylysy aiaqtalǵanyn kútip júrgender de bar!
«Arabi 2 - Granitnyi 2» turǵyn úi kesheniniń qurylysymen tanystym. Bul turǵyn úi kesheni 11 jyl buryn problemaly dep tanylǵan. «Elorda qurylys kompaniiasy» JShS-ǵa tapsyrar kezde turǵyn úi kesheniniń tipti jer ýchaskesi de bolmaǵan. Jer telimin bólý, barlyq qajetti rásimnen ótý boiynsha úlken jumys atqaryldy. Qazirgi ýaqytta B blogy boiynsha qurylys-montaj jumysy júrip jatyr.
«Sadovye kvartaly» turǵyn úi kesheniniń qurylysy 2011 jyly bastalǵan. EQK-ge tapsyrar aldynda qadalary men shuńqyry ǵana bolǵan. Qazirgi ýaqytta ekinshi belgi boiynsha besinshi-altynshy bloktarda páterlerdiń aqaýlaryn joiý jáne olardy abattandyrý jumysy júrgizilip jatyr. Tórtinshi belgi boiynsha jalpy paidalaný oryndaryn árleý, eden tósenishterin quiý, álsiz jelilerdi montajdaý jáne t.b. boiynsha jumys júrgizilip jatyr.
Sońǵy jyldary qurylysy uzaqqa sozylǵan 140-tan astam turǵyn úi kesheni aiaqtaldy. 15,5 myńǵa tarta úlesker otbasy kópten kútken páteriniń kiltin aldy.
Qurylysy uzaqqa sozylǵan nysandardyń aiaqtalýy Memleket basshysynyń tikelei baqylaýynda», - dep jazdy Jeńis Qasymbek.
