Tanymal jýrnalist Irina Beketovany óltirgen kúdikti ustaldy. Bul týraly QR IIM resmi ókili Almas Sadýbaev aitty, dep habarlaidy QazAqparat tilshisi.
QR IIM Kriminaldyq politsiia departamentiniń jedel ýákilderi Aqmola oblysynyń Arshaly aýdany Ijevskoe aýylynda, Esil ózeniniń jaǵasynda iesiz qalǵan ǵimarattan «Nur.kz» jýrnalisi Irina Beketovany qyzǵanysh saldarynan óltirgen A.Gýseinovti qolǵa túsirdi. I.Beketovanyń múrdesi úiiniń kireberisinde soqqy izderimen tabylǵan bolatyn», - dedi Almas Sadýbaev.
Resmi ókildiń aitýynsha, kúdikti ustaý barysynda qarsylyq tanytpaǵan. Politsiia qyzmetkerleri onyń qashýyna múmkindik bermei, dál ústinen túsken.
«Sotqa deiingi tergeý amaldary júrgizilip jatyr», - dedi ol.
Eske salaiyq, tilshi Irina Beketova birer kún buryn qaza boldy. Quqyqqorǵaýshylar onyń azamattyq nekedegi kúieýi 34 jastaǵy Gýseinov Anatolii Mihailovichti kúdikti retinde tanydy. Olardyń ortaq nekeden eki balasy bar.
IIM-niń málimetinshe, A.Gýseinov jýrnalist kelinshekti úidiń kireberisinde ózge er adammen turǵanyn kórgen. Beketova men Gýseinov arasynda urys-keris bastalǵan. Kelinshektiń tanysy ol jerden ketip bara jatyp, áiel soqqyǵa jyǵylyp jatqanyn estigen. «Qaita ainalyp, joǵary kóterilgende es-tússiz jatqan áieldi kórip, jedel járdem shaqyrǵan. Bul ýaqytta Gýseinov belgisiz baǵytqa boi tasalaǵan», - dedi IIM resmi ókili Almas Sadýbaev.
Qylmyskerdi ustaýǵa elordalyq IID-niń barlyq jeke quramy men kúshteri jumyldyryldy.
Kóz jumǵan Irina Beketovanyń sońynda úsh uly men bir qyzy qaldy.
