Foto: QR Jasandy intellekt ministrligi
Astanada QR Jasandy intellekt jáne tsifrlyq damý ministrligi, QR Kólik ministrligi, Astana qalasynyń ákimdigi jáne Yandex Qazaqstan kompaniiasynyń qatysýymen júrgizýshisiz taksidi damytý jónindegi yntymaqtastyq týraly memorandýmǵa qol qoiyldy. Qujat aiasynda taraptar elordada avtonomdy taksi qyzmetin iske qosý týraly kelisimge keldi, dep habarlaidy Ult.kz.
Memorandýmǵa qol qoiý rásimine QR Premer-ministriniń orynbasary – Jasandy intellekt jáne tsifrlyq damý ministri Jaslan Mádiev, QR Kólik ministri Nurlan Saýranbaev, Astana qalasy ákiminiń orynbasary Evgenii Glotov jáne Yandex Qazaqstan kompaniiasynyń basshysy Timýr Shálekenov qatysty.
Qujatqa sáikes, ózdiginen júretin taksi jobasyn 2026 jyldan bastap kezeń-kezeńimen iske asyrý josparlanyp otyr. Bul protsess normativtik jáne tehnologiialyq máselelerdi pysyqtaýdan bastap, pilottyq rejimde iske qosýǵa deiingi kezeńderdi qamtidy.
Júrgizýshisiz taksi qalalyq mobildilikti uzaq merzimdi damytýdyń bir bóligi retinde qarastyrylady. Halyqaralyq zertteýlerge súiensek, avtonomdy tehnologiialar adam faktoryn azaitý arqyly jol-kólik oqiǵalarynyń sanyn tómendetýge, kólik aǵynyn tiimdi basqarýǵa jáne halyqtyń ártúrli toptary, sonyń ishinde qozǵalysy shekteýli azamattar úshin qoljetimdilikti arttyrýǵa múmkindik beredi. Sondai-aq bul sheshim iri qalalarda turaqty kólik júiesiniń mańyzdy elementine ainalýy múmkin.
QR Jasandy intellekt jáne tsifrlyq damý ministrligi Tsifrlyq aktivter jáne serpindi tehnologiialar komitetiniń tóraǵasy Ǵizzat Baitursynovtyń aitýynsha, qaýipsizdik, jaýapkershilik, adam men algoritmderdiń ózara árekettesýi máselelerin aldyn ala pysyqtaý jáne avtonomdy kólik sheshimderiniń zańdy ári ashyq damýyna múmkindik beretin normativtik bazany qalyptastyrý asa mańyzdy. Onyń sózinshe, avtonomdy taksi – tehnologiialar adam igiligine qyzmet etetin «aqyldy qala» ekojúiesiniń bir bóligi.
Al Yandex Qazaqstan basshysy Timýr Shálekenov jobanyń kezeń-kezeńimen iske asatynyn atap ótti. Aldymen servis pilottyq rejimde jáne testileý formatynda jumysyn bastaidy. Bul tásil qalalyq ortanyń naqty jaǵdailaryn eskerýge múmkindik beredi. Jobada táýlik boiy dispetcherlik qyzmetpen bailanys jáne saparlardy saqtandyrý qarastyrylǵan. Júrgizýshisiz kólikti basqarý júiesi jasandy intellektke, jol jaǵdaiyn úzdiksiz baqylaýǵa jáne qaýipsiz áreket etý stsenariilerine negizdeledi. Tájiribe jinaqtalyp, júieniń turaqtylyǵy dáleldengen saiyn qyzmet kórsetý aýqymy keńeitiledi.
Memorandýmǵa qol qoiý memleket, qala jáne tehnologiialyq kompaniialar tarapynan innovatsiialyq kólik sheshimderin damytýǵa degen ortaq múddeni kórsetedi. Qazirgi tańda taraptar normativtik bazany qalyptastyrýǵa, infraqurylymdyq talaptardy baǵalaýǵa jáne júrgizýshisiz kólikti qalalyq ortaǵa integratsiialaý tetikterin taldaýǵa basymdyq berip otyr.
