"Astana" meditsinalyq ýniversitetinen shyǵarylǵan stýdentter oqiǵanyń qalai bolǵanyn aityp berdi, - dep habarlaidy Tengrinews.kz tilshisi.
"Biz eki jyl buryn oqýǵa túsken edik. Emtihandy ózimiz tapsyrdyq. Ýniversitette IELTS tapsyrǵandarǵa basymdyq beriledi. Osydan keiin biz alaiaqtarǵa tap boldyq. Sertifikattyń jalǵan ekenin biz bilmedik. Tirkelmegen sertifikattardyń tiziminde óz aty-jónimizdi kórgende tańǵaldyq. Ýniversitet bizdiń isti IID-ge tapsyrdy. Bizdi 18 sáýirde keshki ýaqytta oqýdan shyǵardy. Bul kúni biz keshendi memlekettik emtihan tapsyrǵan edik. Bizge dissertatsiiany qorǵaý ǵana qalǵan. Sot pen tergeýsiz shyǵaryp jiberdi", - dedi ekinshi kýrs magistratýrasynda oqyǵan Alena esimdi stýdent.
Onyń aitýynsha, ózi de, qurbylary da ýniversitetke oqýǵa ekinshi ret tapsyryp biraq ótken. 2015 jyly olardyń IELTS sertifikaty bolmaǵan, sondyqtan grantqa ilige almaǵan.
"Biz IELTS sertifikatyn bir áielden aldyq, ol bizge ózi habarlasty. Biz oqýǵa baryp júrdik, keiin emtihan tapsyryp, sertifikat aldyq", - dep túsindirdi Alena.
Alenanyń aty-jónin ataǵysy kelmegen qurbysy IELTS tapsyrý aldynda áieldiń barlyq qujatyn teksergenin jáne eshqandai da kúmán bolmaǵanyn aityp otyr. Stýdentter kúzde politsiiaǵa shaqyrtylǵan.
"Sol kezde bizde "qorǵanýǵa quqyǵy bar tergeýshi" statýsymyz boldy. Qyrkúiekte me, qazanda ma bizden jaýap alyndy. IID-ge áieldiń sýretin tanýǵa bardyq. Sertifikat bergen áieldi tanydyq. Basqa eshteńe bilmeimiz. Tergeýshige birneshe ret habarlasyp kórdim, biraq sóndirýli", - deidi Alena.
Ýniversitet ókilderi oqýǵa tek sot arqyly ǵana qaita qabyldanýǵa bolatynyn aitypty. JOO basshylyǵy, stýdentterdiń aitýynsha, olardyń aǵylshyn tili boiynsha keshendi test tapsyrýyna kelisim berip otyr eken.
Osyǵan deiin "Astana" ýniversitetine túsý úshin IELTS sertifikatyn "satyp alǵan" stýdentterdiń oqýdan shyǵarylǵany habarlanǵan edi. Bilim jáne ǵylym ministrligi júrgizgen tekseristerdiń nátijesinde bazada tirkelmegen 117 sertifikattyń bar ekeni anyqtalǵan.
Jalǵan sertifikat satyp alǵan stýdenttiń bári oqýdan kúzde shyǵarylýy tiis bolǵan. Biraq sottyń bul sheshimi ýaqtyly oryndalmaǵan. Mundai jaǵdaida meditsina mamandaryn daiarlaityn oqý ordasy litsenziiasynan aiyrylýy da múmkin.
Keiin Qazaqstannyń bilim jáne ǵylym ministri Erlan Saǵadiev "Astana" meditsinalyq ýniversitetinde shyqqan shýǵa qatysty pikir bildirgen edi.
"Byltyr bilim sapasyn baqylaityn komitetimiz osy ýniversitetti teksergen bolatyn. Olar osy stýdentterdi sabaqtan bosatý týraly buiryq berdi. Degenmen bul buiryqtaǵy keibir talaptar ǵana oryndaldy. Stýdentterdiń bir bóligi sotqa shaǵymdandy, ózderiniń quqyqtaryn qorǵap jatyr. Biraq buiryq qandai jaǵdai bolsyn oryndalýy tiis. Ýniversitettiń olardy oqýdan shyǵarǵany durys. Endi biz Densaýlyq saqtaý ministrligimen jáne ýniversitetpen birige otyryp, kelisý komissiiasyn uiymdastyryp, ári qarai stýdentterdiń jáne ýniversitet ókilderiniń quqyqtaryna qatysty máselelerdi qarastyrýymyz kerek", - degen edi Saǵadiev jýrnalisterdiń suraqtaryna jaýap bere otyryp.
