Elordada jańa oqý jylynyń bastalýyn keiinge shegerý máselesi qarastyrylýda. Bul jaiynda QR Bilim jáne ǵylym vitse-ministri Elmira Sýhanberdieva málim etti, dep habarlaidy Ult.kz tilshisi QazAqparat agenttigine silteme jasap.
«Qazirgi ýaqytta elordanyń bilim basqarmasymen kelesi oqý jylynyń bastalýyn keiinge shegerý máselesi boiynsha kelissózder júrgizilýde. Árbir qala aýmaqtyq negizde oqý jylynyń bastalýyn ózgertý máselesin derbes sheshe alady. Bilim jáne ǵylym ministrligi búkil elge qatysy bar bolǵan kezde ǵana buiryq beredi», - dedi ol.
Osy rette Sýhanberdieva Ýniversiada ótkizilgen kezde Almatynyń qalalyq bilim basqarmasy demalys ýaqyty men oqý toqsanyn keiinge shegerý týraly máseleni derbes sheshkendigin atap ótti. Al Astanadaǵy jańa oqý jylynyń bastalý merziminiń keiinge shegerilýi EKSPO-2017 Halyqaralyq mamandandyrylǵan kórmesiniń elordada ótýimen bailanysty bolmaq.
«Jol-kólik jelisine júkteme joǵary bolýy múmkin. Sondyqtan elordanyń bilim basqarmasy oqýshylarǵa alǵashqy qońyraýdy ádettegidei 1 qyrkúiekte ótkizip, al sabaqty 12 qyrkúiekte bastaý týraly usynyspen shyqty», - dedi vitse-ministr.
Osy rette ol oqý kúnderiniń qysqarýy bilim sapasyna keri áseri bolmaýy tiistigin basa aitty. Onyń sózine qaraǵanda, oqý protsesi taqyryptaryn qaitalaý syndy máseleler qarastyrylýda. Biraq naqty sheshim shyqqan joq. Barlyǵy da kelissózder satysynda júrgizilýde.
«Eger mektepterde 5 kúndik engizetin bolsaq, onda bastaýysh synyptarǵa qosymsha - 5, al joǵary synyptarǵa qosymsha 8 kún kerek bolady», - dedi Sýhanberdieva.
