Jaqynda qalalyq máslihattyń turaqty komissiialarynyń qoǵamdyq tyńdaýynda Astanada ashylatyn tórtinshi aýdanǵa Baiqońyr ataýy usynylyp, maquldandy dep habarlaidy "Ult Aqparat" "Astana aqshamyna" silteme jasap.
Osy aptada qalalyq onomastikalyq komissiia bul ataýdy talqylap, bekitti. Respýblikalyq onomastikalyq komissiia qalalyq komissiia sheshimin ózgertpei, óz otyrysynyń hattamasyn ákimdikke jiberdi. Qalalyq Qoǵamdyq keńes otyrysynda Astana máslihatynyń hatshysy Janat Nurpeiisov osylai dep habarlady.
Qoǵamdyq keńeste qaralǵan máselelerdiń biri Astana qalasynyń shekaralaryn belgileýge qatysty boldy. Onymen Sáýlet jáne qala qurylysy basqarmasynyń basshysy Baqty¬bai Taitaliev tanystyrdy.
"Sońǵy bes jylda Astana halqynyń sany 35 paiyzǵa ulǵaiyp, 645 myń adamnan 1 million 10 myń adamǵa jetti. Byltyr qala territoriiasyna 8 myńnan astam gektar qosyldy. Bul – Maibalyq kóli, panteon. Halyqtyń tyǵyzdyǵy máselesin sheshý úshin jańa mektepterdi, balabaqshalardy, emhanalardy, kólik júiesin, injenerlik infraqurylymdy salý maqsatynda tórtinshi aýdandy ashý qajettiligi týyndady" dedi baiandamashy.
Onyń aitýynsha, tórtinshi aýdannyń shyǵys bóligi Almaty aýdanymen, batys jáne ońtústik bóligi Saryarqa aýdanymen, al Esil ózeni arnasymen Esil aýdanymen shekaralasady. Jalpy alǵanda, qala aýmaǵy 79 myń 733 gektardy qurasa, sonyń ishinde jańa aýdan 18 myń 129 gektardy alady. Halyq sanyna kelsek, onda 211 myń adam turatyn bolady.
Qoǵamdyq keńes otyrysynda, sondai-aq, Astanadaǵy qorshaǵan ortany saýyqtyrýdyń 2018-2020 jyldarǵa arnalǵan keshendi jos-pary jobasy talqylandy. Jobany qalalyq Tabiǵi resýrster jáne tabiǵatty paidalanýdy retteý basqarmasymen birge Qazaqstannyń ekologiialyq uiymdary assotsiatsiiasy ázirledi. Atalmysh assotsiatsiia tóraiymy Aigúl Soloveva keńes músheleri qoiǵan suraqtarǵa jaýap berdi.
Bul jobaǵa sáikes, Promyshlennyi turǵyn alabyn 2-JEO-dan keletin ortalyqtandyrylǵan jylý júiesine qosý josparlanýda. A.Solovevanyń sózinshe, alaida bul eldi mekenniń búkil turǵyndaryn ortalyqtan beriletin jylýmen qamtý ázirge múmkin emes. Tek bir avtonomdy qazandyqty tutynýshylar ǵana ortalyq jylý júiesine qosylady. Sol kezde qazandyq joiylady. Sonyń ózinde aýaǵa taralatyn ziiandy qaldyqtar edáýir azaiatyn kórinedi. Máselen, "Astana Energiia" AQ-tyń qorshaǵan ortany qorǵaý zerthanasynyń meńgerýshisi Natalia Mýhinanyń aitýynsha, qaldyqtar 17 tonnaǵa kemidi.
Otyrysta, buǵan qosa, qala ekologiiasy, elordaǵa gaz tartý máselesi, onyń tiimdiligi týraly biraz aityldy. Osydan birneshe jyl buryn Astananyń birqatar nysany suiytylǵan gazben jylytyla bastady. Aldaǵy jyldary Qyzylordadan qubyr beri qarai tartylyp, Qaraǵandy arqyly tabiǵi gaz da kelýi tiis. Osynyń qaisysy arzandaý bolady? Keńes músheleriniń pikirinshe, aitqandai aiyrmashylyq baiqalmaidy.
Astanadaǵy qorshaǵan ortany saýyqtyrýdyń 2018-2020 jyldarǵa arnalǵan keshendi jospary jobasyn júzege asyrýǵa investorlar tartylmaq. Qoǵamdyq keńes bul jobany bekitti.
