Elordada grek-rim kúresinen qazaqtan shyqqan tuńǵysh Olimpiada chempiony, Eńbek eri Jaqsylyq Úshkempirovti eske alýǵa arnalǵan halyqarlyq týrnir aiaqtaldy, dep habarlaidy "Ult aqparat".
Bairaqty básekege Qazaqstan, Resei, Grýziia, Ýkraina, Tájikstan, Qyrǵyzstan jáne Ózbekstan elderinen 250-den asa sportshy jinaldy. 2001-2003 jylǵy jastar arasynda ótken týrnirde balýandar 55, 60, 63, 67, 72, 77, 82, 97, 130 keli salmaq dárejelerinde baq synady.
Úsh kúnge sozylǵan jarys qorytyndysy boiynsha jalpy komandalyq esepte 5 altyn, 3 kúmis, 13 qola júldemen Qazaqstan jastar quramasy birinshi orynǵa jaiǵasty. Ekinshi oryndy 3 altyn, 2 kúmis, 5 qola medalmen Grýziia quramasy ielense, úzdik úshtikti 1 altyn, 3 kúmis, 1 qola júldemen ózbekstandyq palýandar qorytyndylady.
Shet memleket ókilderi týrnirdiń uiymdastyrylý deńgeiine joǵary baǵa berdi.
«Biz bul týrnirge úshinshi jyl qatarynan qatysyp kelemiz. Byltyr karantin saldarynan jarysqa qatysa almadyq. Osy joly ózimizdiń myqty quramany alyp keldik. Sebebi bul týrnir Eýropa chempionatynyń aldyndaǵy daiyndyq týrniri. Jarys óte joǵary deńgeide uiymdastyrylǵan. Barlyǵy oidaǵydai ótti. Uiymdastyrýshylarǵa rahmet!» - dedi Grýziia jastar quramasynyń bapkeri Gogelia Tomaz.
Nur-Sultan qalasy ákimdiginiń qoldaýymen ótken halyqaralyq týrnir karantin talaptaryna sai jankúiersiz uiymdastyryldy. Báseke Qazsport arnasynan tikelei efirde kórsetildi.
Jarys jeńimpazdary men júldegerleri diplom, medal jáne aqshalai syilyqtarmen marapattalady.
Jarys 7-9 mamyr aralyǵynda ótti.
