Búgin aýrýhanada jatqan órtsóndirýshi Asqar Zabikýlin qaitys boldy, - dep habarlaidy "Ult aqparat" Tótenshe jaǵdailar ministrligine silteme jasap.
"Onyń ómirin aman alyp qalý úshin dárigerler birneshe táýlik boiy aianbai kúresti. Asqar Astana qalasynda bolǵan órt kezinde adamdardyń ómirin qutqarý kezinde batyrlyq tanytty.
Tótenshe jaǵdailar ministrliginiń ujymy Asqar Zabikýlinniń týǵan-týystaryna, jaqyndaryna qaiǵyra kóńil aitady. Ol óz isiniń mamany retinde jadymyzda máńgi qalady.
Asqar aqjarqyn adam, jaýapty qyzmetker, kásibi órt sóndirýshi jáne saýatty maman boldy. Áriptesteri arasynda ádil, óz mamandyǵyn súietin qyzmetker retinde qurmetke ie. TJM qaitys bolǵan órt sóndirýshiniń otbasyna jan-jaqty kómek kórsetedi", - delingen vedomstvo habarlamasynda.
Asqardyń artynda áieli men eki balasy qaldy.
Esterińizge sala keteiik, Astanada Momyshuly dańǵylyndaǵy 15 qabatty úide bolǵan órtten turǵyndardy aman alyp shyqqan órt sóndirýshi birneshe kún aýrýhanada aýyr hálde jatqan edi.
Órt sóndirýshi óz ómirin qaterge tigip úsh adamdy aman alyp shyǵardy. Onyń denesiniń 80%-in kúigen.
Memleket basshysy Qasym-Jomart Toqaevtyń Jarlyǵymen Asqar Zabikýlin I dárejeli "Aibyn" ordenimen marapattalǵan bolatyn.
Órt sóndirýshiniń otbasyna úsh bólmeli páter tabystalatyn boldy. Astana ákimdigi páter demeýshiler qarajaty esebinen beriletinin habarlady.
