Búgin elordanyń úsh aýmaǵynda Qazaqstan Respýblikasy Táýelsizdiginiń 30 jyldyǵyna arnalǵan merekelik otshashý uiymdastyryldy. Otshashý demeýshiler esebinen ótkizildi, oǵan biýdjet qarajaty bólingen joq, dep habarlaidy qala ákimdiginiń resmi saity.
Otshashý elordanyń úsh ornynda uiymdastyryldy: Botanikalyq baq aýmaǵy, Atyraý kópirinen soltústikke qarai Esil ózeniniń sol jaǵalaýy, Pýshkin kóshesi men Abylai han dańǵylynyń qiylysyndaǵy Aqbulaq ózeniniń soltústik jaǵy.
Osylaisha, 10 minýttyq otshashý qalanyń barlyq aýdanynda kórinis tapty.
Atyraý kópiriniń aýdanynan 5000-nan astamy atylyp, otshashýlardyń biiktigi 50-den 150 metrge deiin jetti. Botanikalyq baq pen Pýshkin kóshesiniń aýmaǵynda 1200-den astamy atyldy.
Esterińizge sala keteiik, el Táýelsizdiginiń 30 jyldyǵyna orai elordanyń mádeniet mekemeleri 40-tan astam túrli is-shara ótkizip jatyr. Is-sharanyń bári sanitarlyq normalardy saqtai otyryp ótkiziledi.
Sol siiaqty mereke kúnderi qalada birqatar áleýmettik mańyzy bar nysandar ashylýda.
