Astanada 21 jeltoqsanda Resei, Iran jáne Túrkiianyń bastamasymen Siriia jónindegi kelissózdiń segizinshi kezeńi bastaldy. Negizgi basqosýlar búgin, 22 jeltoqsanda ótedi dep kútilýde, dep habarlaidy "Ult aqparat" Baq.kz portalyna silteme jasap.
Qazaqstan SIM baspasóz hatshysy Ánýar Jainaqov 21 jeltoqsanda ekijaqty jáne kópjaqty kezdesýler ótkenin habarlady, biraq bul kezdesýler jaiynda naqty aqparat bermedi.
Resei, Túrkiia jáne Iran BUU aralasýymen Jenevada ótetin beibit kelissózden bólek Astana kelissózinde Siriiadaǵy soǵysty toqtatýǵa kepil memleketter retinde qatysyp otyr. SIM aqparatyna sáikes, Astana garant elder delegatsiiasyn, Siriia úkimeti men oppozitsiiasyn, BUU ókilderin jáne baqylaýshy elder — AQSh pen Iordaniiany qabyldaidy.
Kún tártibine qaýipsizdik aimaqtaryn qurý, soǵysty toqtatý rejimin baqylaý máseleleri engen. Sonymen birge Siriiany minadan tazartýǵa bailanysty qosymsha ásker jiberý máselesi de qaralady dep otyr. 2011 jyldan beri jalǵasyp kele jatqan soǵysta Siriiada 300 myńnan astam adam qaza tapty.
Siriia soǵysynda Resei men Iran eldiń prezidenti Bashar Asad rejimin qoldaidy. Al Túrkiia men Qurama Shtattar oppozitsiialyq toptarǵa qoldaý kórsetedi.
