Búgin Astanada Raqymjan Qoshqarbaevqa arnalǵan eskertkishtiń resmi ashylýy ótti. 1945 jyly qazaq jaýyngeri reseilik Grigorii Býlatovpen birge Qyzyl ásker quramynda birinshi bolyp Reihstagqa Jeńis týyn tikken. Bul týraly QazAqparat jazdy.
11 metrlik monýment B.Momyshuly men R. Qoshqarbaev dańǵyldarynyń qiylysynda ornalasqan, dep habarlady Astana qalasynyń mádeniet, muraǵattar jáne qujattama basqarmasynan. Jobaǵa sáikes, músindik kompozitsiianyń biiktigi - 6 metr, al granit tuǵyrdyń biiktigi - 4,5 metr. Eskertkishtiń avtory - «Qazaq Eli» monýmentin jasaýǵa qatysqan belgili músinshi Asqar Nartov. Saltanatty shara barysynda Astana qalasy ákiminiń orynbasary Ermek Amanshaev qala turǵyndaryn eskertkishtiń ashylýymen quttyqtady.
«Búgin qazaq jaýyngeri Raqymjan Qoshqarbaevtyń erligin máńgilik etý úshin osy monýmentti ashyp otyrmyz. Onyń esimi óskeleń urpaqtyń jadynda erliktiń simvoly retinde saqtalýy kerek, sol sebepti Qazaqstan táýelsizdiginiń 25 jyldyǵy qarsańynda elordada aty ańyzǵa ainalǵan naǵyz jaýyngerimizge arnap eskertkish ornatyldy», - dedi Ermek Amanshaev.
Saltanatty sharaǵa Raqymjan Qoshqarbaevtyń qyzy - Áliia, aty ańyzǵa ainalǵan keńes jaýyngeriniń nemereleri, sondai-aq, leitenant Qoshqarbaev týraly kitaptyń avtory Qasym Appasuly qatysty. Sonymen qatar, eskertkishtiń ashylýyna qatysqan júzdegen adam uly qazaq jaýyngeriniń músinine gúl shoqtaryn qoidy.
Monýmentti ornatýǵa elorda ákimdigi bastamashy boldy, eskertkishti daiyndaǵan jáne ornatqan «BI-Group».
Raqymjan Qoshqarbaevqa arnalǵan eskertkishtiń ashylýy mańyzdy oqiǵa, óitkeni ol qazaq jaýyngeriniń Ekinshi Uly Otan soǵysynda jasaǵan ólsheýsiz erligi týraly taǵy da bir eske salady. Kóp jyldar boiy keńestik tarihshylar onyń erligin moiyndamai kelgenin aita ketý kerek. 2007 jyly ǵana reseilikter Ekinshi dúniejúzilik soǵysta Berlinde Reihstagty basyp alý kezinde Raqymjan Qoshqarbaev pen Grigorii Býlatovtyń birinshi bolyp tý tikkenderin resmi túrde málim etti. Osy erlikti jasaǵan kezde Qoshqarbaev nebári 21 jasta bolǵan. Batyrlyǵyna qaramastan Keńes áskeri qazaq jaýyngerin eshqandai marapatqa usynǵan joq. Alaida 2001 jyly Qazaqstan Respýblikasy Prezidentiniń jarlyǵymen Raqymjan Qoshqarbaevqa qaitys bolǵannan keiin «Halyq Qaharmany» ataǵy berildi.
