Memleket basshysynyń áleýmettik infraqurylymdy damytý jáne azamattardyń ómir súrý sapasyn arttyrý jónindegi tapsyrmasyn oryndaý aiasynda Úkimet áleýmettik mańyzy bar jobalardy júzege asyrýdy jalǵastyryp jatyr. Osy maqsatta Arnaýly memlekettik qordan 7 mlrd teńge Astanada zamanaýi mektep salýǵa baǵyttaldy, dep habarlaidy ult.kz.
1200 oqýshyǵa arnalǵan jańa bilim berý nysany elordanyń «Nura» aýdanynda boi kóterýde. Qazirgi ýaqytta nysanda qurylys-montaj jumystary júrgizilip jatyr. Jobany keler jyldyń sońyna deiin aiaqtaý josparlanǵan.
Mektep salý qajettiligi halyq sanynyń ósýine bailanysty týyndap otyr. Qazirgi ýaqytta qurylys aýmaǵynda 4 memlekettik mektep jumys isteidi, alaida oqýshy oryndarynyń tapshylyǵy bar. Jańa nysan elordadaǵy №84, №85, №89 jáne №97 mektepterge túsetin júktemeni azaitýǵa múmkindik beredi.
Jalpy qaitarylǵan aktivter azamattar úshin praktikalyq mańyzy bar jobalardy júzege asyrýǵa baǵyttalýda. Úkimet 610 mlrd teńgeden astam somaǵa 500-den astam áleýmettik jobany qarjylandyrýdy maquldady. Qarajat búkil el boiynsha bilim berý, densaýlyq saqtaý, sport jáne kommýnaldyq infraqurylym nysandaryn salýǵa jáne jańǵyrtýǵa bólinýde. Bilim berý salasynda jalpy quny 64,4 mlrd teńge bolatyn 17 jobany júzege asyrý maquldandy. Bul qarajat jańa bilim berý infraqurylymyn salýǵa jáne balalar men jastardyń bilim alýyna zamanaýi jaǵdai jasaýǵa baǵyttaldy.
Buǵan deiin Jambyl oblysynda qaitarylǵan aktivter esebinen eldi mekenderdegi 80 myńnan astam turǵyn gazben qamtylǵanyn jazǵanbyz.
