Nur-Sultan qalasynda 2019 jyldyń jazymen salystyrǵanda qurylysy uzaqqa sozylǵan úilerdiń sany eki ese astamǵa azaiady. Bul týraly elorda ákimi Altai Kólginov Instagram-da jazdy, dep habarlaidy "Ult aqparat".
«Biyl qurylystaryn aiaqtap, taǵy 20 turǵyn úidiń qujattaryn resimdeýge kirisýdi josparlap otyrmyz. Bir jarym jyl ishinde (2019 jyldyń jazynan bastap) qurylysy uzaqqa sozylǵan úilerdiń tiziminen 30 turǵyn úidi alyp tastaýǵa bolady.
20-dan astam problemalyq turǵyn úi qalady. Olardyń qatarynda tek qazanshuńqyrlary turǵan úiler, múldem irgetasy qalanbaǵandary bar. «Territoriia komforta-1« turǵyn úi kesheni 2004 jyldan beri apatty bolyp sanaldy. Úidi tehnikalyq tekserý jumystary qurylys kezinde barlyq normalardyń buzylǵanyn, eger úi paidalanýǵa berilgen jaǵdaida, onyń qulaitynyn kórsetti. Qalǵan qurylystardy 2023 jylǵa deiin kezeń-kezeńimen aiaqtaýdy josparlap otyrmyz», - dedi A.Kólginov.
Ákimniń aitýynsha, ol eki kún boiy birqatar úleskermen jáne Turǵyn úi-qurylys kooperativteriniń tóraǵalarymen kezdesken.
«Olardyń qatarynda «Garant», «Aisanam De Liýks», «Baspana Kóktal», «Arystan», «Zere-1», «Aqerke-2» (1 kezek), «Jastar-4», «Jasyl NS», «Femida», «Altyn Shar», Shyǵys» (1a, 1v), «Jaǵalaý 3» (28,29,30 bloktar), «Orbita», «Territoriia komforta-2» jáne taǵy basqalary bar.
Osy nysandardyń qurylysy egjei-tegjeili talqylanyp, qandai qosymsha sharalar qabyldaý qajet ekeni sheshildi.
Qurylys qarqynyn arttyrý, qujattama boiynsha kómek kórsetý jáne t.b. máseleler talqylandy. Qurylysy uzaqqa sozylǵan nysandardyń qurylysyn qaita bastaý — ońai emes. Qurylys salýshylar úleskerler aldyndaǵy, sondai-aq satyp alýshylar aldyndaǵy barlyq jaýapkershilikti túsinýge tiis.
Áriptesterim men qurylysshylarǵa jumys qarqynyn kúsheitýdi, qajetti qurylys materialdaryn satyp alýdy, injenerlik jeliler júrgizýdi jáne t. b. tapsyrdym», - dep jazdy qala basshysy.
