Astanada aýrýhanada naýqasty soqqyǵa jyǵyp, etikalyq normaǵa jat áreket jasaǵan dáriger jumystan qýylmaq. Bul týraly Temirjol aýrýhanasynyń direktory Sergei Demochkin málimdedi, dep habarlaidy Sputnik Qazaqstan tilshisi.
Kúni keshe áleýmettik jelide dárigerdiń naýqasty soqqyǵa jyqqan sáti túsirilgen video tarady. Atalǵan videoǵa qatysty oqiǵa bolǵan aýrýhananyń dárigeri túsinikteme berip, dárigerge qatysty qandai shara qoldanatynyn aitty.
"Qazirgi sátte materialdar ishki ister departamentinde. Atalǵan faktige qatysty tergeý jumystary júrgizilip jatyr. Sondai-aq qyzmettik tergeý de qolǵa alyndy. Dáriger etikalyq normany buzǵany úshin jumystan qýylady. Osy oraida aita keteiin, patsientterdiń jónsiz qylyq kórsetýi tájiribemizde alǵash ret bolyp otyrǵan joq", — dedi Sergei Demochkin Temirjol aýrýhanasynda ótken brifing barysynda.
Naýqasty soqqyǵa jyqqan 26 jastaǵy dáriger atalǵan aýrýhanada úsh jyldan beri jumys isteidi. Osy ýaqytqa deiin mundai oǵash qylyqtary baiqalmaǵan.
Sondai-aq densaýlyq saqtaý basqarmasynyń resmi ókili Áliia Rústemova bastapqyda nelikten bul aqparatty joqqa shyǵarǵanyn túsindirdi. Buǵan tekserý jumystarynyń uzaqqa sozylýy sebep bolǵan eken.
