Astanada kóshe nemese mektepterdiń birine Úndistannyń kórnekti saiasi jáne qoǵam qairatkeri Mahatma Gandidiń esimin berý usynyldy, dep habarlaidy "Ult aqparat" elorda ákimdigine silteme jasap.
Mundai usynys Astana ákimi Baqyt Sultanovtyń Úndistannyń Tótenshe jáne ókiletti elshisi Prabhat Kýmarmen kezdesýi barysynda aityldy.
«Osy jyly biz 2020 jyldyń 2 qazanyna deiin jalǵasatyn Mahatma Gandidiń 150 jyldyǵyn merekeleýge arnalǵan sharalar tsiklin bastaimyz. Almaty qalasynda onyń qurmetine qoiylǵan kóshe men eskertkish bar. Eger Astana ákimdigi de álem tarihynda óziniń tereń izin qaldyrǵan Gandidiń esimin máńgilik etý ideiamyzdy Qazaqstan astanasynda da qoldasa, qýanar edik», - dedi P. Kýmar.
Bul rette, Elshi Astana kósheleriniń nemese mektepteriniń birine Gandidiń esimin berýdi nemese onyń qurmetine eskertkish ornatýdy usyndy. P. Kýmar eskertkish ornatylatyn jaǵdaida onyń daiyndalýy men jetkizilýi úndistandyq taraptan júzege asyrylatynyn atap ótti.
Astana ákimi Elshiniń aitqan usynysyna qyzyǵýshylyq bildirip, aldaǵy ýaqytta osy jáne ózge de jobalar boiynsha birlesip jumys isteýge daiyn ekendigin jetkizdi.
Taraptar sondai-aq Astanada úndi saýda-iskerlik ortalyǵynyń qurylysyn salý múmkindigin, mádeni sharalardy birlesip uiymdastyrýdy jalǵastyrý syndy máselelerdi talqylady. Budan bólek, B. Sultanov Halyqaralyq qarjy ortalyǵynyń ashylýyna bailanysty biznes júrgizýdiń jańa perspektivasy baryn aityp, úndi kásipkerlerin Astananyń innovatsiia, aqparattyq tehnologiia, bilim jáne densaýlyq siiaqty salalaryna investitsiia quiýǵa shaqyrdy.
