Foto: gov.kz
2026 jylǵy 5 mamyrda Astanadaǵy Maqsut Narikbayev University bazasynda Frantsiianyń Qazaqstandaǵy Elshiliginiń bastamasymen «Lumières» qorynyń saltanatty ashylýy ótti, dep habarlaidy Ult.kz.
"Maqsut Narikbayev University Qazaqstanda «Lumières» Qorynyń qyzmetin bastaýǵa arnalǵan institýtsionaldyq alań bolyp tabylady, qajetti infraqurylymdyq jáne uiymdastyrýshylyq qoldaýdy qamtamasyz etedi. Ýniversitet joba bastamasynan beri onyń damýyna belsendi atsalysyp, Qordy Qazaqstan men Frantsiia arasyndaǵy akademiialyq jáne ǵylymi yntymaqtastyqty keńeitýdiń mańyzdy elementi retinde qarastyrady", - delingen habarlamada.
«Lumières» qory – eki el arasyndaǵy joǵary bilim berý salasyndaǵy bailanysty nyǵaitýǵa baǵyttalǵan qurylym. Qor uzaq merzimdi tujyrymdamalyq jumystyń nátijesinde qurylǵan jáne onyń qyzmeti úsh negizgi baǵytqa negizdelgen: ilgeriletý, qarjylandyrý jáne jańa bastamalardy damytý.
Qordyń basty missiiasy – birlesken bilim berý jobalaryn biriktirý, stýdentterdiń akademiialyq utqyrlyǵyn qoldaý jáne Qazaqstandaǵy frantsýz kásiporyndarynyń kadrlyq qajettilikterin qamtamasyz etý. Sonymen qatar qor oqý baǵdarlamalaryna arnaiy talaptar negizinde sapa sertifikattaryn berýdi kózdeidi.
Búginde qordyń veb-platformasynda 17 qos diplomdyq baǵdarlama men 40-qa jýyq seriktestik týraly aqparat qoljetimdi. Sondai-aq uiym Astana jáne Almaty qalalarynda jyl saiyn bos jumys oryndary jármeńkesin ótkizýdi josparlap otyr. Bul bastamalar akademiialyq orta men biznes qaýymdastyq arasyndaǵy bailanysty nyǵaitýǵa múmkindik beredi.
Qor qyzmetiniń mańyzdy baǵyttarynyń biri – qazaqstandyq stýdentterdiń Frantsiiada bilim alýyna jaǵdai jasaý. Atap aitqanda, bakalavriat deńgeiinde akademiialyq utqyrlyq granttaryn qarjylandyrý jáne jańa bilim berý baǵdarlamalaryn iske qosý úshin investitsiialar tartý kózdelgen. Bul maqsatta frantsýz jáne qazaqstandyq memlekettik ári jeke sektor qarajaty jumyldyrylady.
Joba aiasynda bilim alǵan stýdentter frantsýz jáne eýropalyq standarttarǵa sai daiarlanyp, Qazaqstanda eńbek etýge baǵyttalady. Osylaisha Frantsiia Ortalyq Aziia jastarynyń kásibi damýyna óz úlesin qospaq.
Aita keteiik, «Lumières» qory Frantsiia–Qazaqstan saýda-ónerkásip palatasynyń qoldaýymen júzege asyrylyp otyr. Qor ataýy XVIII ǵasyrdaǵy Frantsiiadaǵy Aǵartýshylyq dáýirine silteme jasap, ǵylym men bilimniń damýyn bildiredi.
