Foto: © Sputnik / Vladislav Vodnev
Astanada jeńil relsti kólikti iske qosý 2025 jylǵa keiinge qaldyryldy. Bul týraly máslihat otyrysynda City Transportation Systems tóraǵasy Ǵani Tájiev málimdedi, dep habarlaidy Sputnik Qazaqstan.
"Jobany jedeldetý úshin eki kezeńmen iske qosý josparlanǵan. Birinshi kezeńde, iaǵni 2025 jyly alǵashqy LRT iske qosylady. Birinshi keshenniń jalpy somasy - 1 mlrd 152 mln dollar nemese jobanyń jalpy qunynyń 61%-y. Osy ýaqytta segiz stantsiia salynyp, bes jyljymaly quram iske qosylady. Quny 735 mln dollar nemese jalpy qunynyń 39%-y quraityn ekinshi iske qosý kezeńinde qalǵan 10 stantsiia paidalanýǵa beriledi. Qosymsha 14 birlik jyljymaly quram iske qosylady. Aiaqtalý merzimi - 2026 jyldyń sońyna deiin", - dedi Tájiev.
Eki keshenniń jalpy quny-1 milliard 887 million dollar. Buǵan deiin Astana ákimi Jeńis Qasymbek LRT-di 2024 jyldyń sońyna deiin iske qosýǵa ýáde bergen bolatyn.
