Foto: ashyq derekkóz
Astanada jol-kólik oqiǵasy saldarynan 13 jastaǵy jasóspirim aýyr halde aýrýhanaǵa tústi, dep habarlaidy Ult.kz.
Qalalyq Densaýlyq saqtaý basqarmasynyń málimetinshe, oqiǵa 11 mamyr kúni bolǵan. Mektep oqýshysy baǵdarshamnyń qyzyl túsine júgirip shyǵyp, joldan ótpek bolǵan sátte ony Renault kóligi qaǵyp ketken.
Jol apatynan keiin jasóspirim shuǵyl túrde №2 kópbeiindi qalalyq balalar aýrýhanasyna jetkizildi. Dárigerler onyń jaǵdaiyn aýyr dep baǵalap otyr. Qazirgi ýaqytta naýqasqa barlyq qajetti meditsinalyq kómek kórsetilýde.
Mamandar jol qozǵalysy erejelerin saqtamaý mundai qaiǵyly jaǵdailarǵa ákeletinin eskertip otyr.
Aita keteiik, buǵan deiin elordada aýla ishinde kishkentai balany kólik qaǵyp ketý deregi tirkelgen bolatyn.
