© Sputnik / Vladislav Vodnev
Janjal kezinde kúieýiniń burynǵy azamattyq áielin óltirgen Astana turǵyny qaza bolǵan áieldiń ókilderimen mediatsiialyq kelisimge kelgendikten, bir jarym jylǵa bas bostandyǵyn shekteý jazasyna kesildi, - dep habarlaidy "Ult aqparat" Astana qalasy Almaty aýdanynyń № 2 aýdandyq sotyna silteme jasap.
Kisi óltirýshige búgin, 5 sáýirde Qylmystyq kodekstiń 101-baby, 1-bóligi (affekt jaǵdaiynda jasalǵan adam óltirý) deregi boiynsha sot úkimi shyqty.
Sot málimetinshe, óltirilgen M., aiyptalýshy R.-nyń kúieýimen resmi nekege turǵanǵa deiin qarym-qatynasta bolǵan, olardyń ortaq balasy bar. R.-nyń kúieýi zańdy túrde úilengennen keiin de jábirlenýshi M.-men qarym-qatynasyn jalǵastyrǵan. Bul R.-nyń uialy telefonyna jiberilgen fotolar men namysyna tietin sózder jazylǵan hattarmen dáleldengen.
"R. jábirlenýshiniń júieli túrde qorlaýy saldarynan emotsionaldyq qozý (affekt) jaǵdaiynda jábirlenýshiniń aýlasyna barǵanda aýyzsha janjal týyndaǵan, janjaldyń sońynda R. jábirlenýshiniń ómirlik mańyzdy múshesine pyshaq suǵyp alǵan. Sonyń saldarynan jábirlenýshi alǵan dene jaraqatynan aýrýhanada kóz jumdy", - dedi sot.
Sotta isti qaraý barysynda taraptar tatýlasý týraly mediatsiialyq kelisimge qol jetkizgen.
"Osyndai jaǵdaida sottyń Qylmystyq is júrgizý kodeksiniń 340-babynyń 1-bóligine sáikes sottalýshynyń jaǵdaiyn nasharlatýǵa quqyǵy joq, sotta prokýror R.-ǵa 1 jyl 6 ai merzimge bas bostandyǵynan shekteý jazasyn surady. Sottalýshynyń kinási R.-nyń óziniń, kýágerlerdiń aiǵaqtarymen, oqiǵa ornynan túsirilgen beinejazbamen, saraptama qorytyndylarymen dáleldendi", - dep túsindirdi sot.
Nátijesinde sýdia R.-nyń qylmysyn ortasha aýyrlyqta dep taýyp, sottalýshynyń bir jasar balasy bar ekenin jáne onyń jasaǵan áreketine ókinýin jeńildetetin mán-jailar dep eskerip, 1 jyl 6 aiǵa bas bostandyǵyn shekteý jazasyn taǵaiyndady.
Úkim zańdy kúshine engen joq.
