Foto: Gov.kz
Erkeǵali Rahmadiev atyndaǵy Memlekettik akademiialyq filarmoniiasynda Qurmanǵazy atyndaǵy Qazaq ulttyq halyq aspaptar orkestriniń kontserti ótti, dep habarlaidy Ult.kz.
Kesh ujymnyń 90 jyldyq mereitoiyna arnap uiymdastyryldy.
Atalmysh kontsert Qurmanǵazy orkestriniń Aqmola oblysynan bastalyp, elordada jalǵasyn tapqan gastroldik saparynyń bir bóligi boldy.
Eki bólimnen turatyn kontserttiń alǵashqy bólimi dástúrli kúishi-kompozitorlarǵa arnaldy. Atap aitsaq, Qurmanǵazy, Dáýletkerei, Táttimbet, Nurǵisa Tilendiev, Qarshyǵa Ahmediiarov jáne taǵy da basqa kompozitorlardyń shyǵarmalary oryndaldy. Bul bólimde ulttyq mýzyka mádenietiniń tereńdigi men bailyǵy, tarihi mańyzy kórsetildi.
Zamanaýi baǵyttaǵy shyǵarmalar men álemdik klassikany qamtyǵan ekinshi bólimde Yanni, Sting, Toni Braxton, Ray Charles, Whitney Houston syndy óner juldyzdarynyń shyǵarmalary usynyldy.
Qazaq orkestrine laiyqtalǵan bul týyndylar ulttyq dástúr men qazirgi zamannyń úilesimdi úndestigin kórsetti. Keshte Qazaqstannyń eńbek sińirgen qairatkerleri, halyqaralyq baiqaýlardyń laýreattary jáne Ahmet Jubanov atyndaǵy daryndy balalarǵa arnalǵan mektep internatynyń violonchelister ansambli óner kórsetti.
Bul kesh – tyńdarman qaýymǵa ulttyq rýhty sezinýge, kúi óneriniń tereńdigin uǵynýǵa jáne mýzykanyń ǵajaiyp álemine saiahat jasaýǵa múmkindik berdi.
Kelesi gastroldik sapar Shymkent qalasynda jalǵasady. Ujym Respýblikalyq «Orkestrler sherýi» festivaline qatysyp, shymkenttik kórermenge «Orkestr túni» atty avtorlyq jobasyn usynbaq.
