Astanada «Shabadandar saiabaǵy» men «Illiýziialar gúlzary» salyndy, dep habarlaidy Elorda Info.
Qalalyq Qorshaǵan ortany qorǵaý jáne tabiǵatty paidalaný basqarmasynyń mamandary jańa gúlzarlardyń erekshelikteri týraly aityp berdi.
Kreativti gúlzardyń biri Saryarqa aýdanynda Birjan sal kóshesi boiynda men Respýblika dańǵyly men Y.Dúkenuly kóshesiniń qiylysynda ornalasqan.
«Gúlzardyń aýmaǵy tolyǵymen abattandyrylyp, jaryqtandyryldy, sporttyq jáne balalar alańdary ornatylǵan. Sáýlettik keńistik qurylymynyń arqasynda árbir gúlzardyń ózine tán qaitalanbas stilge ie», - dedi basqarmanyń mamany Erasyl Sembaev.
Respýblika dańǵyly men Y.Dúkenuly kóshesiniń qiylysynda ornalasqan shaǵyn saiabaq «Illiýziialar gúlzary» degen ataýǵa ie. Munda skeitdrom, optikalyq illiýziiany jasaý úshin qoldanylatyn qisyq formadaǵy Eims bólmesi, syrǵanaq tóbeshigi jáne balalar alańy bar.
Al Birjan sal kóshesindegi №5 turǵyn úidiń janyndaǵy gúlzar «Shabadandar baǵy» degen ataýǵa ie boldy. Sebebi, ol temirjol vokzalyna jaqyn ornalasqan. Baq aýmaǵynda shabadan formasynda jasalǵan kishi sáýlet formalary ornatylǵan. Joba avtorlary balalarǵa arnalǵan temir jolyn salýdy josparlaǵan. Al qurylysshylar avtordyń oiyn júzege asyrý úshin arnaiy temirden rels jasady.
Basqarmanyń tabiǵatty qorǵaý jobalaryn basqarý bóliminiń basshysy Azamat Janataevtyń aitýynsha, jańa baqtyń ornynda buryn apattyq jaǵdaidaǵy eki qabatty eski úiler bolǵan.
«Jobalar kreativti, belgili taqyrypqa arnalǵan. Bul jerdiń qurylysy 2018 jyldyń mamyr aiynda bastaldy. Vokzal mańyndaǵy baq vokzal túrinde jasalǵan. Gúlzarlar úlken emes, Illiýziialar gúlzary - 2 765 sharshy metr, al Shabadandar parki 2 293 sharshy metr. Eki jobanyń quny shamamen 130 mln teńge», - dedi A.Janataev.
Budan bólek, biyl qyrkúiek aiynda Saryarqa dańǵylyndaǵy 27 úidiń mańynda «Tastar gúlzarynyń» qurylysy aiaqtalady.
Baqtyń aýmaǵy 2 304 sharshy metr. Qurylys jobasynyń quny shamamen 55 mln teńge. Bul aýmaq túrli kólemdegi úlken tastarmen bezendiriledi. Tranzittik aimaq demalysqa arnalǵan úsh alańǵa bólinedi.
Bir jaǵynda túrli sporttyq jabdyqtary bar sport alańy, ortasynda alyp tastar bolady. Al úshinshi jaǵynda tamaqtaný men saýda pavilondary bolady dep josparlanǵan.
