15 aqpanda Astana qalasyndaǵy kontsert zalyna jinalǵan júzden astam adam áleýmettik máselelerin aityp, qala ákimimen kezdesýdi talap etti, dep habarlaidy Azattyq.
Sharadan tikelei efirde habar taratqan Azattyq tilshisiniń habarlaýynsha, munda búgin ákimdik ókilderi "Ashyq esik kúni" sharasyn ótkizbek bolǵan. Biraq oǵan qala ákimi Baqyt Sultanov jáne onyń orynbasarlary kelmegen. Astana qalalyq ákimdik ókilderi tilshige tek basqarma jetekshileriniń keletinin habarlaǵan.
Jinalǵan top kóp balaly analarǵa memleket tarabynan járdemniń azdyǵyn aityp, jórgekpuldy ósirýdi, baspana máselelerin sheship berýdi talap etti. Olar 6 aqpanda bilik ókilderine qoiǵan talaptaryna da jaýap estigisi keletinderin aitty. Zalda bilik ókilderine ótinish jazyp turǵan kóp balaly analardyń biri otbasymen birge eki bólmeli vremiankany jaldap turatynyn, bilikten baspana máselesin sheship berýdi talap etip otyrǵanyn aitty.
Búgin buǵan uqsas sharalar Qazaqstannyń ózge qalalarynda ótedi dep habarlanǵan. Azattyqtyń Shymkenttegi tilshisi Diliara Isanyń aitýynsha, qazir qaladaǵy "Túrkistan" saraiyna myńnan astam adam jinalǵan. Olar qala ákimimen kezdesýdi kútip otyr.
4 aqpanǵa qaraǵan túni Astananyń Kóktal-1 shaǵyn aýdanynda jeke úidiń aýlasyndaǵy ýaqytsha baspana órtenip, bir otbasyndaǵy 2006, 2008, 2013, 2015 jáne 2018 jyly týǵan bes qyz bala opat bolǵan edi. Osy oqiǵadan keiin kóp balaly analar narazylyǵy kúsheigen.
6 aqpanda Astanada júzdegen ana jinalyp, bilikten járdemaqy men jórgekpuldy ósirýdi, kóp balaly otbasylardyń balalaryna tegin bilim berýdi, ana men balany tegin emdeýdi, baspana alýdy jeńildetýdi talap etken. Keiin astanalyq analardyń talabyn basqa aimaqtaǵy áielder de qoldaǵan.
6 aqpanda Qazaqstan prezidenti Nursultan Nazarbaevtyń halyq turmysyn jaqsartý úshin úkimette jumys toby qurylǵan. 12 aqpanda eńbek jáne halyqty áleýmettik qorǵaý ministri Mádina Ábilqasymova jumys toby aiasynda kóp balaly analardy baspanamen qamtamasyz etý máselesi qaralatynyn aitty.
