Elordada politsiia, jedel járdem jáne tótenshe jaǵdailardaǵy qyzmetterdiń nómirleri bir júiege biriktiriledi. Bul týraly OKQ-da ótken baspasóz máslihatynda Astana qalasy ákimdigine qarasty iKomek qalalyq ortalyǵynyń ákimshilik qarjylyq departament direktory Aqan Nurǵojin málim etti, dep habarlaidy "Ult aqparat".
OKQ-da ótken baspasóz máslthatynda iKomek ortalyǵynyń basshysy Jánnat Dúbirova ortalyq 2018 jyldyń qańtar aiynda qurylyp, barlyq kommýnaldyq qyzmetterdiń jáne qalalyq basqarmalardyń, atap aitqanda 4 aýdandyq ákimdiktiń, 17 qalalyq ákimdik basqarmalarynyń, 33 kommýnaldyq jáne apattyq qyzmetteriniń, 81 lift sharýashylyqtarynyń nómirin 1-0-9 nómirine biriktirgenin atap ótti.
«Astanalyqtar bailanys ortalyǵynyń tiimdiligine kóz jetkizip, osy qyzmetti belsendi túrde paidalanady. Sondai-aq, elordanyń tynys-tirshiliginiń barlyq máseleleri boiynsha óz ótinishterin, usynystary men shaǵymdaryn táýlik boiy joldap otyrady», - dedi ol.
Óz kezeginde tilshilerdiń suraǵyna jaýap bergen iKomek qalalyq ortalyǵynyń ákimshilik qarjylyq departament direktory Aqan Nurǵojin aldaǵy ózgerister týraly aityp berdi.
«Adam ómirine qaýipti jaǵdailar boiynsha 101, 102, 103 jáne 112 nómiri bar. Osy barlyq nómirlerdi aldaǵy ýaqytta Astana jáne barlyq eldi mekenderdi 112 nómirine biriktirý josparlanyp otyr. Merzim boiynsha osy jyldyń ekinshi toqsanynda bul jumys iske asyrylady dep kútilip otyr. Ártúrli apatty jaǵdaida da osy qyzmetterdiń bári úilestirilip, barlyq qyzmet bir nómir arqyly kórsetiletin bolady», - dedi Aqan Nurǵojin.
