Elordadaǵy Táýelsizdik saraiynda «Qazirgi zamanǵy sóz energiiasy» atty halyqaralyq ádebi forým jumysyn bastady. Sharanyń ashylý rásimine QR Mádeniet jáne sport ministri Arystanbek Muhamediuly qatysyp, sóz sóiledi, dep habarlaidy "Ult aqparat".
«Qazaq ádebietiniń búgingi qal-ahýaly barshamyzdy alańdatatyny daýsyz. «El ádebietin qaitsek álemge tanytamyz?» degen másele barshamyzǵa ortaq. Endeshe túrli memleket ókilderimen mádeni jáne ádebi bailanys ornatý maqsatynda ótkizilip otyrǵan búgingi sharanyń orny erekshe. Tarihqa kóz júgirtsek, mundai aýqymdy shara elimizde sońǵy ret 1973 jyly ótken. Araǵa jarty ǵasyrǵa jýyq ýaqyt salyp el ordasy - Astana forýmy qonaqtaryna qushaǵyn aiqara ashyp otyr», - dep atap ótti ministr.
Osy rette ol Elbasy N.Nazarbaevtyń «Rýhani jańǵyrý» baǵdarlamalyq maqalasy aiasynda ótip otyrǵan forýmǵa Eýraziia qurlyǵynyń beldi qalamgerleri shaqyrylǵanyn basa aitty.
«Óz kezeginde jańa zamandaǵy álem ádebietiniń kórnekti ókilderin el ordasy - Astanada qarsy alý ultymyz úshin úlken abyroi jáne zor jaýapkershilik! Osy rette, Memleket basshysynyń «Álem bizdi qara altynmen nemese syrtqy saiasattaǵy iri bastamalarymyzben ǵana emes, mádeni jetistikterimizben de tanýy kerek» degen qanatty sózin taǵy bir eske alýdy jón kórip otyrmyn. Búgingi shara, mádenietimiz ben ádebietimizdi álem jurtshylyǵyna tanystyrý úshin berilgen birden-bir múmkindik», - dedi ministr.
Osy oraida Arystanbek Muhamediuly Mádeniet jáne sport ministrliginiń atynan jáne óz atynan forýmnyń ótýine atsalysqan, elimizdegi eń alǵashqy jáne eń iri shyǵarmashylyq birlestikterdiń biri - Jazýshylar odaǵyna úlken rizashylyn bildirdi. Sonymen qatar forýmǵa qatysýshylarǵa jáne onyń jumysyna sáttilik tiledi.
