Astanada alty balasymen jaldamaly úide turyp jatqan ana biznesmennen úsh bólmeli páter syiǵa aldy, dep habarlaidy Sputnik.
Qurylys kompaniiasynyń baspasóz qyzmeti habarlaǵandai, aty-jónin aitýdy jón kórmegen kásipker qymbat kólikten bas tartyp, oǵan jinaǵan 17 million teńgesin kópbalaly otbasyǵa páter satyp alýǵa jumsaǵan.
"Maǵan bul jańalyqty habarlaǵanda, birden sene qoimadym. Túsim eken dep oiladym. Al kompaniianyń satý bólimine ertip barǵanda, qýanyshymda shek bolmady. Bárinen de qyzdarym qatty qýandy. Endi olardyń armandaǵan óz bólmesi bolady", — dedi Janar Úzdenbaeva kózine jas alyp.
Jańa turǵyn úi kesheninen úsh bólmeli páter satyp alýǵa kásipkerge kem degende jeti million teńge jetpegenin eskerip, qurylys kompaniiasy qalǵan shyǵyndardy, sondai-aq turǵyn úidi taza árleýden ótkizýdi óz moinyna alypty.
Baspasóz qyzmetiniń málimetinshe, kópbalaly otbasy kelesi aida, iaǵni naýryzda jańa páterge kóshe alady.
Janar Úzdenbaeva úshin mundai syilyq kútpegen oqiǵa bolyp qana qoimai, bolashaqta balalaryn laiyqty azamat etip tárbieleýine úlken senim berdi. Endi jesir ana jaldamaly úige ketetin qarajatty óz balalaryn emdeýge jumsamaq. Biriniń kórý qabiletin qalpyna keltirý qajet bolsa, endi birimen psiholog jumys isteýi kerek – ákesiniń qazasynan keiin bala tilden qalǵan.
