Foto: aitu.city
Astananyń oń jaǵalaýynda avtobýs kútip turǵan eki adamnyń ústine aialdamanyń áinegi qulady. Politsiia sotqa deiingi tergeý bastady, dep habarlaidy Sputnik Qazaqstan.
Oqiǵanyń videosy áleýmettik jelide jariialandy. Qatty jelden aialdamada turǵan egde jastaǵy adamdardyń ústine shyny qulaǵan. Zardap shekkender erli-zaiypty bolyp shyqty.
Er adamnyń jambasy synǵan, oǵan ota jasalady.
Astana qalasynyń politsiia departamenti osy faktige qatysty túsinikteme berdi.
"Qylmystyq kodekstiń 306-baby "Qaýipsizdik talaptaryna sai kelmeitin taýarlardy shyǵarý nemese satý, jumystardy oryndaý ne qyzmetter kórsetý" boiynsha sotqa deiingi tergeý bastaldy. Tiisti saraptamalar jasalady", - delingen habarlamada.
Tergeý jalǵasyp jatyr.
