Elorda turǵyny mas kúiinde bireýdiń kóligin aidap ketip, bir kúnde eki ret jol apatyn jasaǵan, - dep habarlaidy "Ult aqparat" Polisia.kz basylymyna silteme jasap.
Elorda turǵyny saǵat 12:52-de “102” arnasyna B.Momyshuly dańǵylyndaǵy turǵyn úidiń kireberisiniń janynan Mercedes-Benz G 500 markaly avtokóligin aidap ketkeni týraly habarlaǵan. Shaǵymdanǵan azamatsha kóligin otaldyrylǵan kúiinde jáne esigin qulyptamai, ashyq qaldyryp ketkenin, ornyna qaita kelgen sátte kóliktiń joqtyǵyn kórip, politsiiaǵa júgingen.
Qylmyskerdi izdeýge jáne ony ustaýǵa politsiianyń jeke quramy baǵyttalǵan. Beinebaqylaý kameralaryn zerdeleý barysynda úidiń aýlasynda júrgen belgisiz er adam, kólikti otaldyryp qoiyp otyrǵany jáne úiine kirip bara jatqan áieldi baqylaǵany anyqtaldy. Osy sátti paidalanyp, ol rólge otyryp, Land Cruiser 200 avtokóligimen soqtyǵysyp, kólikti ári qarai aidap kete bergen.
Sondai-aq, Táýelsizdik dańǵyly men Baitursynov kóshesiniń qiylysynda kelesi Lexus avtokóligimen soqtyǵysqan. Sol ýaqytta politsiia qyzmetkerleri qaskúnemdi qolǵa túsirdi. Kýálandyrý nátijesi boiynsha 34 jastaǵy er adam ortasha aýyrlyqtaǵy mas kúiinde bolǵan.
QR ÁQBtK-niń 608-babynyń 3-bóligine sáikes kólik quralyn alkogoldik masań kúide júrgizgeni úshin ustalǵan adamǵa qatysty ákimshilik is qozǵalyp, oǵan qosa QR QK-niń 200-baby "Aidap áketý" deregi boiynsha sotaldy tergeý bastaldy.
"Mundai qylmystardyń sebebiniń biri - kólik ieleri temir tulparyn ashyq qaldyrý nemese túngi ýaqytta esigin jabýdy umytyp ketedi. Osy siiaqty sebepter urlyq pen aidap áketý úshin qoljetimdilikke ákeledi", - deidi. "Almaty" PB aýdandyq politsiia bóliminiń bastyǵy Daniiar Janqulov.
Elorda politsiiasy kólik quraldarynyń ielerine qyraǵy bolýǵa, óz kólikteriniń terezelerin, esikteri men júksalǵyshtaryn ashyq qaldyrmaýǵa, kólikti arnaiy turaqtarda, jaryqtandyrylǵan oryndarda jáne beinebaqylaý kameralarynyń kórinetin aimaǵyna qoiýǵa qatań túrde keńes beredi.
