Foto: Olympic.kz
Erteń Astanada dziýdodan halyqaralyq Grand Slam jarysy bastalady. Bedeldi týrnirge álemniń 49 elinen 400-den astam dziýdoshy qatysady, dep habarlaidy Ult.kz.
Olardyń qatarynda Olimpiada jáne álem chempiondary bar. El astanasyna qazirdiń ózinde eki dúrkin Olimpiada chempiony Takanori Nagase (Japoniia), Rio-2016 jeńimpazy Rafaela Silva (Braziliia), Parij Olimpiadasynyń chempiony Beatriz Soýza (Braziliia) jáne otandasymyz, Parij Olimpiadasynyń qola júldegeri Ǵusman Qyrǵyzbaev jáne basqa da juldyzdar keldi. Bul týrnir — álemdik dziýdo arenasyndaǵy eń joǵary dárejeli jarystardyń biri.
Erejege sáikes, jarysty qabyldaýshy el ár salmaqta tórt sportshyǵa deiin qatystyra alady. Bul jas sportshylardyń tájiribe jinaqtaýyna jáne IJF álemdik reitinginde mańyzdy upailar enshileýine jol ashady.
Týrnirge Eldos Smetov te qatysady. Alaida, bul joly tek qurmetti qonaq retinde. Jankúierler qazaq sportyndaǵy ańyz tulǵamen júzdesip, estelikke sýretke túse alady.
Grand Slam jeńimpazdaryna - 1000, kúmis júldegerge — 700, al qola medal iegerine 500 reitingtik upai beriledi. Bul upailar Olimpiada joldamasyna talas jolyndaǵy sheshýshi mánge ie.
Atalǵan jarys — Halyqaralyq dziýdo federatsiiasynyń kúntizbesindegi álem chempionatyna deiingi sońǵy iri týrnir. Ulttyq quramanyń bapkerleri sportshylardyń daiyndyǵyn osy synda naqty baǵalai alady.
Jarystar Jaqsylyq Úshkempirov atyndaǵy Jekpe-jek saraiynda ótedi jáne Qazsport telearnasynan tikelei efirde kórsetiledi. Kirý — tegin. Bul — jankúierler úshin álemdik dziýdo juldyzdaryn kózbe-kóz kórýge taptyrmas sát!
