Astanada EKSPO-2017 kórmesi kezinde tanymal ánshi Dimash Qudaibergenniń jeke kontserti ótedi. Bul týraly EKSPO-2017 halyqaralyq mamandandyrylǵan kórmesiniń mádeni oiyn-saýyqtyq jáne sporttyq is-sharalarynyń keshendi baǵdarlamasy jariialanǵan expo2017culture.kz saitynda habarlandy.
Kontsert elordadaǵy «Saryarqa» Respýblikalyq velotreginde 27 maýsym kúni keshki 19:00-de bastalady dep kórsetilgen. Kesh 2 saǵatqa sozylady dep josparlanǵan. Ázirge biletter satylymǵa shyqqan joq.
Esterińizge sala keteiik, Dimash Qudaibergen buǵan deiin «Jenmin jibao» («Halyq gazeti») basylymyna suhbat berip, qytailyq azamattardy Astanada ótetin EKSPO kórmesine shaqyrǵan bolatyn.
«Biyl maýsym aiynda Qazaqstanda EKSPO-2017 halyqaralyq kórmesi ashylady. EKSPO kórmesi tuńǵysh ret Ortalyq Aziia elinde ótkiziledi. Barlyqtaryńyzdy Qazaqstanǵa kelip, EKSPO kórmesin tamashalaýǵa, qazaqtyń ásem tabiǵatyn kórýge, dámdi taǵamdarynan aýyz tiiýge shaqyramyn. Bári sátimen bolsa, men atalmysh kórmede án aitatyn bolamyn», - degen edi ánshi.
Kúni keshe «Singer 2017» án baiqaýyna qatysyp jatqan Dimash Qudaibergen onynshy kezeńde O.Baiseńgirdiń sózine jazylǵan óziniń «Umytylmas kún» atty ánin qazaq jáne qytai tilinde oryndap, úshinshi orynnan kórindi. Osylaisha ol finalǵa joldama alǵan-tyn.
