Qańtar aiynda Astana qalasyndaǵy birqatar mektepke Alash arystarynyń aty berilýi múmkin. Bul týraly ǵalym Dixan Qamzabekuly Alash avtonomiiasy jáne Alashorda úkimetiniń 100 jyldyǵyna orai uiymdastyrylǵan «Alash muraty jáne rýxani jańǵyrý: sabaqtastyq pen jalǵastyq» atty ǵylymi-tájiribelik konferentsiiada málimdedi, dep habarlaidy "Ult aqparat" Baq.kz portalyna silteme jasap.
«Astanany aralap júrseńiz, Álihan Bókeihan, Ahmet Baitursynuly atyndaǵy kóshelerdi kóresiz. Búgingi kún tártibinde osy kóshelerdi nemese bilim, mádeniet ordalaryn mazmundyq jaǵynan qalai tolyqtyramyz degen suraq tur», - dedi Eýraziia ulttyq ýniversitetiniń prorektory, alashtanýshy ǵalym.
Osy maqsatta Astanada birneshe mektepke Alash ziialylarynyń atyn berý máselesi on jyldan beri kóterilip kelgen. Onyń aitýynsha 2018 jyldyń qańtarynda on mektepke Alash qairatkerleriniń aty berilmek.
«Qazir qalada 80-nen astam orta bilim ordasy bar. Onyń jartysy - qazaq tilinde jáne ol áli de kóbeiýi kerek. Birazy - aralas mektep. Al qańtarda úlken bir jańalyqty kútip otyrmyz. Astana qalasynda onnan asa mektep Alash ziialylarynyń atyn surady. Bul máseleni kótergenimizge on jyldan asa ýaqyt ótti. Álihan Bókeihan, Qoshke Kemeńgeruly, Ahmet Baitursynuly, Smaǵul Sádýaqasov, Mirjaqyp Dýlatuly atyndaǵy mektepter paida bolady degen úmitte otyrmyz. Barlyǵy qazir respýblikalyq onomastika komissiiasyna tústi jáne «qoldaý tabady» degen úlken qýanyshty habar jetip otyr. Bul elimizdiń Alash avtonomiiasy men Alash úkimetiniń 100 jyldyǵyna qosqan bir úlesi bolar edi», - dedi ol.
Konferentsiiaǵa alashtanýshylar, ǵalymdar, qalamgerler, memlekettik mekemelerdiń, saiasi partiialardyń, úkimettik emes uiymdardyń jáne jastar qoǵamdyq birlestikterdiń ókilderi qatysty.
