Elordada qatty aiaz saldarynan aialdama áinekteri shytynap, turǵyndarǵa qala ishinde júrip-turý qiyndap tur, - dep habarlaidy óńirdegi NUR.KZ tilshisi.
Astanada qytymyr qys qaharyna minip, úskirik aiaz kúsheigeli beri, elordalyqtardyń da ábden berekesi qashty. Qalada jaiaý júrginshilerdiń qarasy sirep, taksi júrgizýshilerniń «qyzmeti» qyza túsken.
"Mynadai aiazda avtobýs kútýdiń ózi qiyn, qalyń kiinbeseń bet-júzińdi úsirip alýyń ábden múmkin. Sondyqtan, qala halqy jappai taksi ustap álek. Keshe áleýmettik jeliden aiazdy kúnderi taksister baǵany sharyqtatyp jiberdi degendi oqydyq, bári qur syldyr sóz. Kerisinshe, shamamyz jetkenshe jol-jónekei kózge ilikken jolaýshylardy dittegen jerine jetkizip tastaýǵa tyrysyp jatyrmyz. Sońǵy bes jylda mundai aiaz bolmaǵan, endi, eki-úsh kún shydap ketsek, aiazdyń betin qaitady degen úmittemiz", -deidi astanalyq Beisen esimdi taksi júrgizýshisi.
Qaladaǵy aiazdyń qatty bolǵany sonshalyq, tipti, aialdama áinekteri sýyqqa shydamai, shytynap ketip jatyr. Mundai kórinis, shahar ishindegi birneshe aialdamada baiqalady.
Elordadaǵy aiaz saldarynan, keibir keńse ǵimarattaryndaǵy synap baǵanasy da tómendei túsken. Máselen qalanyń qaq ortasynda ornalasqan «Qazkom» bankiniń myna bólimshesinde, qyzmetkerler tipti, syrt kiimmen qyzmet etýge májbúr.
Qala ishinde boi kótergen muz alańdyra da qańyrap bos tur.
Al elordanyń atyshýly jyly aialdamalarynyń sýyqta pana bolatynyna kúmán kóp. Máselen Saýran kóshesiniń boiynda ornalasqan myna jyly aialdama qabyrǵalaryn qyraý basyp, ishi qańyrap tur.
"Kórgenderińizdei, tipti, Wifi bolady dep kútilgen edi. Qaidaǵy internet? Tek jelden pana bolady demeseńiz, jai aialdamadan túk aiyrmashylyǵy joq, azynap tur. Hanshatyr jaqtaǵy aialdamada pesh degen bolýshy edi, mynda kórgenderińizdei pesh degeniń atymen joq. Myna aiazda osy aialdamalardy jylytyp qoisa bolar edi ǵoi", - dep kúiindi elordalyq aqsaqal.
Sonymen qatar, turǵyndar qala ishindegi avtobýstardyń da ýaqtyly júrmeitinin, saldarynan, aialdamada saǵattap kólik kútýge májbúr ekendikterin jetkizdi.
«Avtobýstardyń kesheli beri ýaqyttary ózgergen, jaida tez kele qalatyn №32 men №50-shi avtobýstar búgin jarty saǵatta bir júrip jatyr. Sumdyq emes pe? Jarty saǵatta nemiz qalady? Úsip qalatyn boldyq», - dep sózin jalǵastyrdy qariia.
Aita keteiik, elimizdiń birqatar oblystarynda kesheli beri aýa temperýtarasy kúrt tómendep, kei aimaqtarda túnde tipti - 45 gradýsqa deiingi aiaz bolady dep boljanyp otyr.
Osyǵan orai, elordada kesheden beri mektep oqýshylaryna sabaq toqtatylyp, qala biligi memlekettik organdar men jumys oryndaryna turǵyndardy jumystan erte qaitarýǵa shaqyryp otyr.
