Elordanyń qoǵamdyq densaýlyq saqtaý basqarmasy basshysynyń orynbasary Gúlnaz Dosmyrzaeva Pfizer vaktsinasyn qansha astanalyq turǵyn saldyrǵanyn aitty, dep habarlaidy QazAqparat.
«15 qarashadan bastap elorda Pfizer preparatymen júkti jáne bala emizetin áielderdi, 12-18 jas aralyǵyndaǵy balalardy vaktsinalaýǵa kiristi. Tolyq úsh apta ishinde osy vaktsinamen tiisti kontingentten 9 300 adam vaktsinalandy. Pfizer qabyldaý boiynsha kóshbasshylar qatarynda jasóspirimder tur – 6 200-den astam bala, odan keiin bala emizetin analar bar – 2 800-den astam. Al júkti áielder sany – 206. Balalar ekpeni meditsinalyq uiymdarda da, óz mektepteriniń meditsinalyq pýnkterinde de ala alady», - dedi Gúlnaz Dosmyrzaeva ákimdikte ótken brifingte.
Ol 22 qarashadan bastap búkil el boiynsha koronavirýs infektsiiasyna qarsy revaktsinatsiia bastalǵanyn eske saldy.
«Búgingi kúni qala boiynsha KVI-ǵa qarsy qaitalama vaktsinany meditsina qyzmetkerleri, pedagogtar, kúsh qurylymdarynyń qyzmetkerleri, 60 jastan asqan jáne immýniteti tómen adamdar, meditsinalyq-áleýmettik mekemelerdiń personaly men kontingentinen 2 100-ge jýyq adam aldy. Revaktsinalaý sanitarlyq normalar men komponentter arasyndaǵy aralyqty qatań saqtai otyryp júrgiziledi. Vaktsinany meditsinalyq uiymdar men saýda-oiyn-saýyq ortalyqtarynan, saýda úilerinen alýǵa bolady», - dep túiindedi G. Dosmyrzaeva.
