Nur-Sultan qalasynyń patrýldik politsiia polkiniń qyzmetkerleri iz kesý arqyly urlyq jasaǵan kúdiktini qolǵa túsirdi, dep habarlaidy "Ult aqparat" Nur-Sultan qalasy PD baspasóz qyzmetine silteme jasap.
Qylmys týraly politseilerge 78 jastaǵy zeinetker habarlady.
Onyń aitýynsha, tús kezinde ol Beisekova kóshesi boiymen úiine kele jatqan. Sol kezde jas jigit jaqyndap, qai jerden tústenip alýǵa bolatynyn suraidy.
Eshteńeden kúdiktenbegen qariia joldy túsindire bastaǵanda, jigit ony judyryqpen uryp jibergen.
Ury kúsh kórsetip, aqshasy, qujaty men eki uialy telefon salynǵan sómkesin urlap, qashyp ketken.
Garajdar mańynda sómkeden aqshany, telefondy alyp, qujattardy laqtyryp ketken.
Nur-Sultan qalasy politsiia departamentiniń jedel basqarý ortalyǵy qyzmetkerleri tez arada áreket etip, kúdiktini anyqtap, 30 jastaǵy er adamdy qolǵa túsirdi.
Ustalǵan azamat buryn qylmystyq jaýapqa tartylǵany belgili boldy.
Ol ýaqytsha ustaý izoliatoryna qamaldy.
«Urlyq» baby boiynsha qylmystyq is qozǵaldy.
