Elordada kópqabatty úidegi órtten 3 adamdy qutqarǵan órt sóndirýshi aýrýhanada hal ústinde jatyr, dep habarlaidy «Ult aqparat» elorda ákimdiginiń baspasóz qyzmetine silteme jasap.
«Keshe Astanada B.Momyshuly dańǵylyndaǵy 15 qabatty úide alapat órt boldy. Órt sóndirýshiler óz ómirin qaterge tigip, bes adamdy aman alyp shyǵardy. Olardyń biri – Asqar Zabikýlin zardap shekkenderge kómekteskenimen, denesin qatty kúiik shalyp, qazir óte aýyr jaǵdaida jatyr», – delingen habarlamada.
Órt kópqabatty úidiń 11-qabatynda tutanǵan. Asqar Zabikýlin páterge tereze arqyly kirý úshin qutqarý arqanymen 12-qabattan 11-qabatqa túsken. Al ishke ený úshin qorshaýdy alyp tastaýyna týra kelgen. Sol ýaqytta ol ústindegi kamýfliaj kiimimen janyp jatqan páterge kirip, 80 jastaǵy ájei men 22 jastaǵy nemeresin ottan shyǵarǵan.
Sondai-aq, batyl órt sóndirýshi kórshi páterge júgirip baryp, balkonǵa jasyrynǵan jáne qoiý tútinniń saldarynan shyǵa almai qalǵan 10 jasar balany qutqaryp úlgergen.
«Asqar Zabikýlin asqan jankeshtiliginiń arqasynda alapat órtten birneshe adamdy qutqaryp qaldy, alaida ózi aýyr jaraqat alyp, óte qiyn jaǵdaida jatyr. Órt sóndirýshige bettiń, arqanyń, ishtiń, aiaqtyń joǵarǵy jáne tómengi jaǵynyń 2-3 dárejeli kúiikteri, kúiik shok degen diagnoz qoiyldy. Zaqymdaný dárejesi – 80%. Qazir ol ókpeni jasandy jeldetý apparatynda jatyr», – deidi ákimdik.
Aita keteiik, keshe elordada kópqabatty úide órt bolyp, 3 adam, onyń ishinde 1 bala aýrýhanaǵa túsken edi.
