Astana qalasynyń ákimdigi atalǵan joba úshin biýdjetten arnaiylap 100 mln teńge bólip otyr. Búgin 1 mln teńgeniń nominaldy turǵyn úi sertifikattaryn 100 adam aldy. Olardyń arasynda dárigerler, muǵalimder, politsiia qyzmetkerleri bar. Qarajat Turǵyn úi qurylys jinaq banki («Báiterek» holdinginiń enshiles uiymy) arqyly páter satyp alý úshin bastapqy jarna retinde qoldanylady.
- Memleket basshysy óz joldaýynda ákimdikterge halyqqa arnalǵan ipoteka qoljetimdiligin arttyrýdy tapsyrdy. Biz elordalyq bilikpen birigip bul jumysty aldyn-ala bastap kettik jáne búgin Astana turǵyndaryna alǵashqy turǵyn úi sertifikattaryn tapsyryp otyrmyz. Bólingen qarajat olar úshin ýaqtyly kómek bolmaq, biýdjet qyzmetkerleri 20% kólemindegi bastapqy jarnany tezdetip jinai alady. Osydan keiin Turǵyn úi qurylys jinaq banki olarǵa jyldyq mólsherlemesi 7%-dan aspaityn nesie beredi. Zaemnyń eń uzaq merzimi 25 jylǵa teń, al somasy 25 mln teńgeden aspaidy. Memleket, ákimdikter, bankter birlesip, osyndai tártippen jumys istei bastasa, 10 jyl ishinde Qazaqstandaǵy kezekte turǵan azamattar sanyn eki ese qysqartýǵa bolady. Qazir atalǵan kórsetkish 440 myń adamǵa teń, - dep ótti Turǵyn úi qurylys jinaq banki Ortalyq filialynyń direktory Jansultan Mataev.
Astana qalasy ákimdigi turǵyn úi sertifikattarynan úmitkerler tizimin ázirledi. Ótinim berer sátte muǵalimderdiń, dárigerlerdiń jáne politsiia qyzmetkerleriniń, sondai-aq olardyń otbasy músheleriniń Astana qalasynda turaqty tirkeýde turýy qajet boldy. Sondai-aq úmitkerlerden Turǵyn úi qurylys jinaq bankiniń salymshysy atanyp, shottarynda jinaq aqshasynyń bolýy talap etildi.
Iriktelip alynǵan úmitkerler tizimin Astana ákimdigi Turǵyn úi qurylys jinaq bankine tólem qabilettiligin rastaý úshin jiberdi. Osydan keiin úmitkerlerdiń aqtyq tizimi ázirlenip, bir ai ishinde qarajat Turǵyn úi qurylys jinaq bankindegi shottarǵa aýdarylady. Budan soń áleýmettik kómek iegerine úi tańdap, onyń iesi atanýǵa úsh ai ýaqyt beriledi.
