"Astana" meditsinalyq ýniversitetiniń rektory Májit Shaidarov joǵary bilimin ári qarai jalǵastyrý úshin oqýǵa túsken kezde aǵylshyn tilinen jalǵan sertifikattar tapsyrǵany úshin júzden astam stýdenttiń JOO-nan shyǵarylýyna qatysty pikir bildirdi, dep habarlaidy Ult.kz tilshisi Sputnik Kazakhstan agenttigine silteme jasap.
Rektordyń aitýynsha, ol osy rezidentter, magistranttar men doktoranttardy shaqyryp, sertifikattarynyń British Council tiziminde joq ekenin eskertken eken.
"Nesine jasyramyz, olar sertifikattyń jalǵan ekenin jaqsy bildi. Biz olardyń ar-uiaty oianatyn shyǵar dep kúttik. Quqyq qorǵaý organdarynyń iske aralasqanyn bile tura, oqýdan ketý týraly aryzdy ózderi jazýy tiis bolatyn. Menińshe, olar óz betimen aryz jazyp, oqýdan shyǵýy kerek edi. Birazy solai istedi, degenmen osy kúnge deiin 84 adam sertifikatymyz jalǵan emes dep júre bergen", — deidi Shaidarov beisenbi kúni baspasóz máslihatynda.
Rektor atap ótkendei, jalǵan sertifikattardy JOO-darda taratyp júrgen adamdy izdep tabý qajet.
"Bilim alýshylardyń ózimen sóilesip, "Sertifikattardy qaidan aldyńdar?"dep suraǵanymda, kúmiljip, "kóshede bir áiel jolyǵyp, sertifikat alýdy usyndy" dep jaýap berdi. Bul endi balanyń sózi emes pe? Bildei dáriger bolyp júrgen adam solai dei me?", — deidi Shaidarov.
"Jalpy, oqýdan shyǵarylǵan bilim alýshylardyń úlgerimi jaqsy bolatyn jáne tek bir rezident úlgeriminiń nasharlyǵyna bailanysty ýaqytynda oqýdan shyǵaryldy. Sertifkat daýyna bailanysty oqýdan shyǵarylǵan 117 bilim alýshynyń 82-si rezidentýrada, 24-i magistratýrada jáne 11-i doktorantýrada oqityn. Sonyń ishinde, 66 azamat birinshi oqý jylynda, 51 azamat ekinshi jylynda oqýdan shyǵaryldy. Sonymen qatar, ai saiyn magistranttar úshin 61 561 teńge, rezidentter úshin 67 myń jáne doktoranttar úshin 81 myń teńge shákirtaqy tólenetin. Al, bilim alý shyǵyndary, magistranttar, rezidentter jáne doktoranttar úshin sáikesinshe 65 myń, 67 myń jáne 120 myń teńge bolatyn", - degen JOO basshysy sáikes sot sheshimi shyqqannan keiin bul qarajat memleket paidasyna qaita óndiriletinin aitty.
Keshe belgili bolǵandai, elordalyq "Astana" meditsinalyq ýniversitetiniń júzden astam stýdenti magistratýraǵa túsken kezde jalǵan IELTS sertifikattaryn paidalanǵany úshin oqýdan shyǵarylǵan. Stýdentter joǵary bilim men shákirtaqyǵa jumsalǵan memlekettik qarajatyn qaitarýy tiis.
