Búgin Turǵyn úi qurylys jinaq banki "Baqytty otbasy" baǵdarlamasy boiynsha baspanaly bolǵan elordalyqtardy quttyqtady. Kópbalaly otbasylar jyldyq mólsherlemesi 2%-tik ipoteka alǵan. Ai saiynǵy tólem 80 myń teńgeden aspaidy.
Memlekettik qyzmetker 140 myń teńge jalaqymen qalai úili boldy
Erkinbek Ábýov – kópbalaly áke, jubaiymen tórt qyz tárbielep otyr. Balalarynyń úlkeni 6-synypta oqysa, kenjesi biyl mektep tabaldyryǵyn attaidy eken.
Jambyl oblysynyń týmasy otbasymen astanaǵa 2011 jyly qonys aýdarǵan. Sodan beri páter jaldap turady.
"Eń alǵash kelgenimizde jataqhanada turdyq. Keiin qala shetindegi "Lesnaia poliana" aýdanyna kóshtik. Sebebi, ol jaqta úidiń arendasy tómen. Sońǵy kezderi aǵaiyndardyń úiin panaladyq. Tórt balamen páter jaldaý, árine, ońai emes. Úidiń qojaiyny telefon soǵyp, "páterdi satamyn, bir apta ishinde bosatyńdar" dep te aitqan kezder boldy. Túrli qiynshylyq kórdik", - dep áńgimesin bastady elorda turǵyny.
42 jastaǵy Ábýov – memlekettik qyzmetker. Ulttyq ekonomika ministrligi statistika komitetinde bas sarapshy bolyp qyzmet etedi. Jary ýniversitette oqytýshy bolyp istegen, biraq qazir balalarǵa qarap, úide otyr.
Ákimdikte kezekte turǵan kópbalaly otbasy arzan ipoteka jaily jańalyqtardan estigen. Esh oilanbastan, qatysýǵa bel býypty.
"Baqytty otbasy" baǵdarlamasy týraly estigen boida, turǵyn úi qurylys jinaq bankine habarlastym. Olar baǵdarlamanyń shilde aiynda iske qosylatynyn aitty. Sodan aiyna eki ret menedjerlerge telefon soǵyp, surap turdym. 18 shildede qýanyshty habar da kelip jetti. Birden ótinish jazyp, qajetti qujattardy jinadyq. Ótinishimiz maquldanǵannan keiin, páter izdeýge kiristik ", - deidi ol.
"Atyna zaty sai baǵdarlama"
Ábýovter otbasy baspanany elordanyń Saryarqa aýdanynan tapqan. Úsh balasy osy aýdandaǵy mektepte oqidy eken, sondyqtan tańdaý da osy jerge túsken.
Bir bólmeli páterdiń aýmaǵy – 50 sharshy metr. Qoldanystaǵy úi alty aidan beri bos tur eken. Qojaiyny, bastapqyda, baspana úshin 15 million teńge surapty. Biraq, bank otbasynyń kirisine bailanysty tek 14 million teńge bóletin bolǵandyqtan, jomarttyq tanytqan.
"Meniń jalaqym – 140 myń teńge. Bank ailyqty eskere otyryp, 14 million teńge bóletin boldy. Óz atymyzdan 10 protsent bastapqy jarnany saldyq, iaǵni 1 million 400 myń teńge. Endi on alty jyl boiy ai saiyn 74 600 teńge tólep turamyz. Bylai qarap otyrsań, bul kóp emes. Óitkeni dál osy Saryarqa aýdanynda bir bólmeli páterdi shamamen 100-110 myń teńgege jalǵa alasyń. Sol aqshany bireýge bergenshe, óz úiińe tólegen jaqsy emes pe", - deidi Ábýov.
Aitýynsha, otbasylyq tabysty eseptegen kezde, kópbalalylarǵa beriletin járdemaqy eskerilmeidi.
"Óte tamasha, atyna zaty sai baǵdarlama. Sebebi óz kúshimizben 14 million teńge jinai almas edik. Júrekti qýanysh kernep tur", -deidi baspanaly bolǵan memlekettik qyzmetker.
"Ózińdi anaǵurlym senimdirek sezinesiń"
Nur-Sultan qalasynyń turǵyny Aqqaiyń Syzdyqova da qonys toiyn atap ótýge daiyndyq ústinde. Ipotekalyq baǵdarlamaǵa kópbalaly otbasy retinde qatysqan. Jubaiymen eki ul, egiz qyz tárbielep otyr.
"Baqytty otbasy" baǵdarlamasy týraly teledidardan estip bildik. Keiin turǵyn úi qurylys jinaq bankine habarlasyp, konsýltatsiia aldyq. Menedjermen aqyldastyq, bizge baǵyt-baǵdar berdi. Qujat jinaýdy 17 shildede bastadyq. Sodan keiin bank tólem qabilettigin tekserdi. Kóp uzamai "páter izdeńiz" dedi. Negizi, páter izdeýge úsh ai ýaqyt beredi. Alaida men uzaq júrmei, bir-eki apta ishinde taýyp aldym",- dep kúldi qýanyshy qoinyna syimaǵan jas ana.
Syzdyqova tórt balasyna memleketten ai saiyn 10 myń teńge járdemaqy alady. Ózi elordadaǵy №1 mektep-litseide hatshy, jalaqysy 50 myń teńge. Kúieýi jekemenshik kompaniiada júrgizýshi bolyp isteidi. Ailyǵy 130 myń teńge.
"Páterimiz eki bólmeli, jóndelgen. Qoldanystaǵy turǵyn úiden aldyq. Toǵyzynshy qabatta, ishi keń, jaily, aýlasy úlken. Aýmaǵy 50 sharshy metr. Ipoteka on alty jylǵa berildi. Endi ai saiyn 79 myń teńge tólep turamyz", - deidi ol.
Kópbalaly otbasy baspanany 15 million teńgege satyp alǵan. 1 million 500 myń teńge bastapqy jarnany erli-zaiyptynyń ata-anasy jinap beripti.
"Osyǵan deiin ata-enemizdiń úiinde turyp keldik. Endi óz shańyraǵymyz bar. 2013 jyldan beri ákimdikte baspana kezeginde turdym. Bastapqyda jalpy kezekte 17 myńynshy bolyp turǵan edik. Keiin kópbalaly otbasylardy bólek kezekke shyǵaryp, eki myńynshy boldym", - deidi astanalyq turǵyn.
Syzdyqova baspanaly bolý erekshe sezim ekenin aitady.
"Ózimdi múldem basqa adam sezinemin. Burynǵyǵa qaraǵanda, anaǵurlym senimdirek sezinesiń. Balalarymyz úshin, olardyń bolashaǵy úshin tyrysyp jatyrmyz. Ózimizdiń baspanamyz bolǵanyna óte qýanyshtymyn. Turǵyn úi qurylys jinaq bankine keremet múmkindik úshin rizamyn", - dep alǵysyn bildirdi kópbalaly ana.
"Baqytty otbasy" baǵdarlamasy týraly ne bilemiz?
"Baqytty otbasy" baǵdarlamasyna kópbalaly, tolyq emes jáne múmkindigi shekteýli balasy bar otbasylar qatysa alady.
10 protsenttik bastapqy jarna bolǵan jaǵdaida, ipoteka jyldyq 2%-pen 20 jylǵa deiingi merzimge beriledi.
Otbasynyń ár múshesine shaqqanda bir ailyq tabystyń mólsheri eń tómengi jalaqy – 42 500 teńgeden aspaýy tiis. Járdemaqy kiris retinde sanalmaidy.
Nur-Sultan, Almaty, Shymkent, Aqtaý jáne Atyraýda qaryzdyń eń joǵary somasy – 15 million teńge. Qalǵan óńirlerde – 10 million teńge.
