Elordada ótetin Astana protsesine kelissózderge qatysýshy barlyq tarap keledi. Bul týraly búgin QR Syrtqy ister ministrliginiń resmi ókili Aibek Smadiiarov aitty, dep habarlaidy QazAqparat.
«10-11 jeltoqsanda Nur-Sultanda Astana protsesi aiasynda Siriia boiynsha joǵary deńgeidegi 14-shi halyqaralyq kezdesý ótetini málim. Siriia boiynsha Astana protsesiniń barlyq taraptary kelissózderge qatysatynyn rastady jáne bizdiń elordamyzǵa kele bastady. Olardyń arasynda kepilger-memleketterdiń delegatsiialary – Resei, Túrkiia jáne Iran, Siriia úkimeti men Siriia qarýly oppozitsiiasy bar», - dedi Aibek Smadiiarov.
Onyń atap ótýinshe, kezdesýge baqylaýshy retinde BUU bas hatshysynyń Siriia jónindegi arnaiy ókili Geir Pedersenniń basshylyǵymen arnaiy delegatsiia qatysady. Resei delegatsiiasyn RF Prezidentiniń Siriia boiynsha arnaiy ókili Aleksandr Lavrentev basqarady. Iran delegatsiiasy eldiń Syrtqy ister ministriniń saiasi máseleler jónindegi aǵa kómekshisi Ali Asgar Hadjidiń basshylyǵymen qatysatyn bolady.
«Is-shara bastalǵanǵa deiin bir kún buryn kepilger-elderdiń ókilderi sarapshylar deńgeiinde eki jaqty jáne úsh jaqty konsýltatsiialar ótkizýge nietti. Jalpy otyrys barlyq taraptardyń qatysýymen 11 jeltoqsanǵa josparlanǵan», - dedi ol.
