«Astana Opera» Kameralyq zaly áigili ánshi Kúlásh Baiseiitovanyń esimimen atalatyn bolady, dep habarlaidy teatrdyń baspasóz qyzmeti.
Osynaý ataýly kúnniń qurmetine orai 13 qyrkúiekte «Qazaqtyń bulbuly» kontserti ótedi.
«Búgingi tańda «Astana Opera» Kameralyq zaly – kóptegen mýzykanttar óner kórsetýge umtylatyn elimizdiń bedeldi kontserttik alańy. Bul zal klassikalyq murany saqtap, jańaryp otyratyn qazaqstandyq qoǵamnyń rýhani suranystaryn qanaǵattandyratyn qazaq jáne álemdik mýzyka mádenieti dástúrlerin tasymaldaýshy. Atalmysh sahnada Qazaqstannyń ǵana emes, dúniejúziniń áigili ártisteri óz ónerlerin pash etken, qazir de óner kórsetip júr. Kameralyq zaldyń budan keiin Kúlásh Baiseiitova zaly bop atalýy biz úshin zor qurmet. Ol «KSRO halyq ártisi» joǵary ataǵynyń alǵashqy iegerleriniń jáne sol ataqty jas kezinde alǵan tulǵalardyń biri. Onyń tabiǵi mýzykalyq daryny men álemdik mýzykanyń asyl qazynasyna qaldyrǵan muralary bizdiń jadymyzda. Ol somdaǵan Shuǵanyń beinesi ánshiniń sheberlik turǵydan óskenin kórsetti, al E.G.Brýsilovskiidiń «Qyz-Jibek» operasyndaǵy Jibektiń partiiasy ánshige klassikalyq opera óneriniń shyńyna kóterilýge jol ashty», - dedi Qazaqstannyń eńbek sińirgen qairatkeri, «Astana Opera» direktory Ǵalym Ahmediarov.
«Budan bólek, kóptegen ártisterimiz Kúlásh Baiseiitova atyndaǵy Ulttyq opera jáne balet teatrynda jumys istep, kórnekti ánshige degen mahabbaty men qurmetin saqtap, ózderimen «Astana Operaǵa» tamasha operalyq dástúrlerdi ala keldi. Asqaq ónerge oryndaýshylyq ónerdiń juldyzdaryna ainalǵan on myńdaǵan túlek syilaǵan tamasha mýzyka mektebi jumys isteitin Almaty qalasymen qatar, endi qalamyzda Kúlásh Baiseiitovanyń esimi qaita jańǵyratyny qýantady», - dep sózin qorytyndylady teatr direktory.
Osy mańyzdy oqiǵa qarsańynda Kúlásh Baiseiitovanyń qyzy – Qarlyǵash Baiseiitova óziniń balalyq shaǵy týraly jyly estelikteri týraly aitty, óziniń meiirimdi jáne qamqor anasynyń arqasynda qandai baqytty bolǵany týraly kóp áńgimeledi. Ol elordanyń mádeni ómiri úshin «Astana Opera» Kameralyq zalynyń aty ańyzǵa ainalǵan tulǵa – Kúlásh Baiseiitovanyń esimimen atalýy úlken qýanysh ekenin atap ótti.
Qyzy anasynyń alǵys hattarynyń birneshe kóshirmesin, sondai-aq áigili ánshiniń jeke muraǵatynan alynǵan fotosýretti teatrdyń art-galereiasyna tapsyrdy. 13 qyrkúiekte teatr foiesinde aitýly oqiǵaǵa orai kórme ótedi.
«Kúlásh Baiseiitova atyndaǵy Kameralyq zal sahnasynda óner kórsetetin barlyq ártisterge tabys tileimin, premeralar men kontsertter odan da kóp bolsyn dep tilegim keledi, – dedi Qarlyǵash Baiseiitova.
