Álemniń 280-raketkasy, 20 jastaǵy qazaqstandyq tennisshi Timofei Skatov Astana Open ATP 250 týrniriniń ekinshi ainalymyna shyqty, dep habarlaidy QazAqparat.
Jýyrda Qazaqstannyń absoliýtti chempiony atanyp, osy jarysqa shaqyrtý alǵan Skatov alǵashqy ainalymda álemniń 87-raketkasy, 37 jastaǵy italiialyq Andreas Seppimen sheberlik baiqasty.
Bir qyzyǵy, Seppi 2002 jyly kásipqoi sporttaǵy jolyn bastaǵan kezde Skatov 1 jasta edi.
Tájiribeli tennisshi birinshi partiiada 3:0 esebimen alǵa ketkenimen, Timofei qarymta qaitaryp, tarazy basyn teńestirdi. Tai-breikte qazaqstandyq sportshy sátti oinady – 7:6 (7:3).
Ekinshi sette Skatov 3:0 esebimen alǵa shyqqanymen, Seppi alysqa uzatpai, qatarynan bes geim aldy – 5:3. Aqyry ol óz múmkindigin múlt jibergen joq – 6:4.
Úshinshi, sheshýshi partiiada qazaqstandyq tennisshi 5:0 esebimen alǵa ketti. Sodan keiin matchqa dop bergende, qatelespedi – 6:1.
Tartysty ótken báseke 2 saǵat 56 minýtqa sozyldy.
Match barysynda Skatov 2 eis jasap, 7 breik-pointtyń tórteýin paidalana bildi. Qarsylasy 6 eis, 3 breikke (10 breik-point) qol jetkizdi.
Skatov ekinshi ainalymda álemniń 52-raketkasy, Belarýs ókili Ilia Ivashka nemese reitingte 169-satydaǵy shvetsiialyq Elias Imerdiń bireýimen sheberlik baiqasady.
Taǵy bir qazaqstandyq Denis Evseev irikteý saiystarynyń finalynda aýstraliialyq Mark Polmansqa 4:6, 2:6 esebimen ese jiberip, negizgi jarysqa shyǵa almai qaldy.
