Astana men Almatyda eski elektro-turmystyq tehnikalardy qabyldap, energiia únemdeitin jańa tońazytqyshqa jeńildik berý naýqany bastaldy, dep habarlaidy QazAqparat tilshisi.
Atalǵan naýqandy BUU Damý baǵdarlamasy Qazaqstandaǵy energiia tutyný kólemin azaitý maqsatynda uiymdastyryp otyr. Munda eski nemese isten shyqqan tońazytqysh, elektr plitasy syndy turmystyq tehnikany ótkizgen turǵyndarǵa energiia únemdeitin jańa tońazytqyshqa 16 500 teńge jeńildik kýpony beriledi.
«Qazaqstanda elektr energiiasyn tutyný kólemi jyldan-jylǵa artyp keledi. Elimizdegi elektr energiiasynyń qurylymy kóp jaǵdaida kómirge, qazbaly otyn túrlerine negizdeledi jáne sáikesinshe atmosferaǵa parniktik gazdar kóp bólinedi. BUU Damý baǵdarlamasy aiasynda biz energiia únemdeýge jáne energetikalyq tiimdilikke erekshe kóńil bólemiz. Sondai-aq, energetikalyq turǵyda tiimdi ónimderdi qoldanýdy nasihattaimyz. Taldaý júrgizý arqyly turmystyq qurylǵylar arasynda eń kóp energiiany tońazytqysh qajet etetinin anyqtadyq. Jalpy somasy 33 mln teńgege 2 myń kýpon ázirlep otyrmyz», - deidi Qazaqstandaǵy BUU Damý baǵdarlamasy Turaqty damý jáne ýrbanizatsiia departamentiniń basshysy Ramazan Jampeiisov.
Óz kezeginde QR IDM Indýstriialyq damý jáne ónerkásiptik qaýipsizdik komitetiniń basqarma basshysy Jaqsylyq Toqaev energetikalyq tiimdi turmystyq qurylǵylardy satyp alýdy nasihattaý qajettigin jetkizdi.
«Bir tońazytqysh jylyna 400 kilovatt qýatty tutynady. Sońǵy jyldary shyǵarylǵan tońazytqyshtardyń energetikalyq tiimdiligi artyp keledi. Buryndary A sanaty bolsa, qazir A+, A2+ shyǵaryldy, bolashaqta A4+ úlgisi de paida bolýy múmkin. Memleket basshysy energiiany únemdeý, energetikalyq turǵyda tiimdi qurylǵylardy satyp alýdy nasihattaý jóninde tapsyrmalar berdi. BUU Damý baǵdarlamasymen birlesken jobamyz da osyǵan baǵyttalǵan», - dedi J. Toqaev.
Aita keteiik, jeńildik kýpony arqyly jańa tońazytqyshty «Mechta» jáne «Tehnodom» dúkenderinen alýǵa bolady. Naýqan 2018 jyldyń 1 qazanynan 1 jeltoqsanǵa deiin jalǵasady. Eski turmystyq tehnikalardy mamandar tegin alyp ketedi. Ol úshin Astanada - 8 (7172) 64-25-33 nómirine, Almatyda - 8 (7273) 11-54-52 nómirine habarlasý kerek.
