Vashingtonda alǵash ótken Dúniejúzilik banktiń «Tsifrly dáýirdegi basqarý» GovTech forýmynda Astana memlekettik qyzmet haby álemdik qarjy uiymynyń ǵalamdyq áriptesi retinde tanyldy.
GovTech salasyndaǵy álemniń jetekshi zertteýshileri, novatorlary men praktikteri turaqty jáne ádiletti keleshek úshin ideia almasyp, memlekettik sektorda tsifrly transformatsiiany qalyptastyrý maqsatynda jinaldy.
Jiynǵa Astana memlekettik qyzmet haby basqarýshy komitet tóraǵasy Alihan Baimenov qatysty. Forýmda, onyń sózine qaraǵanda, «jańa tehnologiialardyń qoǵamnyń úkimetke senimin nyǵaitýǵa da paidaly ekendigi aitylǵan». «Bul iste úkimet pen jeke kompaniialardyń áriptestik ornatýy mańyzdy. Sebebi, zertteýler jeke kompaniialardyń tehnologiialaryna senim, ortasha alǵanda, úkimettik quraldarǵa qaraǵanda joǵary ekendigin kórsetken», - dedi Alihan Baimenov. Ol sonymen birge Astana memlekettik qyzmet habyna Dúniejúzilik banktiń jahandyq áriptesi atanýy úlken qurmet ekenin jetkizdi.
Sapar barysynda Alihan Baimenov pen QR Prezidenti ákimshiligi memlekettik basqarý bólimi jetekshisi Altair Ahmetov AQSh kadr qyzmeti Keńsesi (ORM) joǵarǵy jetekshileri - Rob Shraiver, Mark Lambert jáne basqa qyzmetkerlermen kezdesti. OPM ókilderi amerikalyq memlekettik qyzmet júiesi erekshelikterin, onyń ishinde kadrlardy irikteý men baǵalaý úderisi jaily baiandady. Oǵan qosa olar joǵarǵy memlekettik qyzmet (Senior Exesutive Service - Qazaqstandaǵy «A» korpýsy balamasy) jumysyna toqtaldy. Taraptar yntymaqtastyqty ári qarai damytý joldaryn, onyń ishinde Qazaqstan men aimaq elderi memlekettik qyzmetshileri biliktilikterin arttyrý baǵdarlamalary týraly pikir almasty.
AQSh - Astana haby quryltaishylarynyń biri, bul eldiń memlekettik qyzmetti jetildirýdegi ozyq tájiribesi aimaq elderi úshin benchmark sanalady.
