Qazaqstanda respýblikalyq biýdjet shyǵystarynyń ońtailandyrylyp jatqany belgili. Osy jumys sheńberinde elordadaǵy Astana LRT jeńil relsti kólik jobasynyń keleshegi ne bolady? Bul suraq búgin Úkimettiń baspasóz ortalyǵynda Ulttyq ekonomika ministri Rýslan Dálenov pen QR birinshi qarjy vitse-ministri Berik Sholpanqulovqa qoiyldy, dep habarlaidy QazAqparat.
«Qazirgi ýaqytta Esep komitetiniń Astana LRT jobasyna qatysty keńesi Úkimetke kelip tústi. Qazir qaraýda jatyr. Aldaǵy ýaqytta dáleldemeler men keńester keńinen talqylanady. Osydan keiin jobany jalǵastyrý nemese jalǵastyrmaý jaǵyna qatysty sheshim qabyldanady», - dedi QR birinshi qarjy vitse-ministri Berik Sholpanqulov.
Áriptesiniń jaýabynyń izin ala sóz sóilegen Ulttyq ekonomika ministri Rýslan Dálenov te jobaǵa qatysty naqty sheshim qabyldanbaǵanyn rastady.
«Astana LRT – jergilikti biýdjettiń, iaǵni qalanyń jobasy. Sol úshin bul rette qalamen (ákimdigimen) keńesken abzal. Qazir naqty sheshim qabyldanǵaly otyr. Sebebi bul jobany júzege asyrýdyń artyqshylyqtary men kemshilikteri de bar. Bári ólshenip, qazirgi jaǵdaiǵa bailanysty sheshim qabyldanady», - dedi ol.
Eske salsaq, Prezident byltyr kúzde LRT qurylysyn jedeldetýdi jáne oǵan qatysty isti tergeýdi tapsyrǵan bolatyn.
Artynsha osy jyldyń qańtar aiynyń sońynda Sybailas jemqorlyqqa qarsy is-qimyl agentiginiń ekinshi departamentiniń basshysy Sergei Perov elordada LRT qurylysyn salý barysynda qarajat urlaý qylmystyq isin tergeý sharalary aiaqtalǵanyn málim etken edi. Onyń aitýynsha, anyqtalǵan shyǵyn somasy 5,7 mlrd teńgeni qurap otyr. Atalǵan is boiynsha 10-nan astam adamnyń jaýapkershiligi tekserilip, úsh adamǵa izdeý jariialanǵan.
